বাক্সা, ৬ জানুৱাৰী: ৰাইজৰ অসাৱধানতাৰ বাবেই ৰাজপথত সঘনাই সংঘটিত হয় পথ দুৰ্ঘটনা । যাৰ ফলত বহু লোকে হেৰুৱাইছে তেওঁলোকৰ মূল্যবান জীৱন । ৰাজ্যৰ পৰিবহণ বিভাগে চালক আৰু পৰিচালক সকলৰ কাৰণে বিভিন্ন নিয়ম বান্ধি দিছে যদিও সেয়া যেন কোনোপধ্যে মানিব নোখোজে একাংশ চালকে । হেলমেট আৰু চিটবেল্ট পৰিধান নকৰাৰ বাবেও পথ দুৰ্ঘটনাত বহু লোকে হেৰুৱাইছে প্ৰাণ ৷ বিভিন্ন সময়ত স্বেচ্ছাসেৱী সংগঠনৰ লগতে বিভাগীয় কৰ্তৃপক্ষই সজাগতা মূলক ব্যৱস্থা গ্ৰহণ কৰিছে যদিও সজাগ নহয় সাধাৰন ৰাইজ ৷
বুধবাৰে বাক্সা জিলা পৰিবহণ বিভাগৰ উদ্যোগত আৰু নেদফিল্মচ নামৰ এটা ব্যক্তিগত স্বেচ্ছাসেৱী সংগঠনৰ সহযোগত জিলা খনৰ মুছলপুৰৰ ৰাজপথত সজাগতা সৃষ্টিৰ বাবে কাৰ্যসূচী গ্ৰহন কৰে । গুৱাহাটীৰ পৰা অহা নেদফিল্মচ নামৰ স্বেচ্ছাসেৱী সংগঠনটোৱে ৰাইজক সজাগ কৰাৰ উদ্দেশ্যে ৰাইজৰ মাজত বাটৰ নাট, নৃত্য আৰু পুস্তিকা বিতৰণ কৰে । হেলমেট আৰু চিটবেল্ট পৰিধান নকৰা আৰু যান বাহন আইন নমনা চালক সকলক হেলমেট আৰু চিটবেল্ট পিন্ধিবলৈ অনুৰোধ জনাই সজাগতা সৃষ্টিৰ প্ৰয়াস কৰে ৷
