বাক্সা,19 নৱেম্বৰ: বাক্সা জিলাৰ তামুলপুৰ মহকুমাৰ অন্তৰ্গত ভাৰত-ভূটান সীমান্তত বাস কৰা শতাধিক মহিলাই আজিপৰ্যন্ত লাভ নকৰিলে সূলভ মূল্য়ৰ সামগ্ৰী ৷ যাৰ ফলত বৃহস্পতিবাৰে মহিলাসকলে ৰেচন কাৰ্ডসমূহ লৈ তামুলপুৰস্থিত যোগান বিভাগৰ কাৰ্যালয়ৰ সন্মুখত সাব্যস্ত কৰে তীব্ৰ প্ৰতিবাদ ৷
প্ৰতিবাদস্থলীত দৰঙামেলা, পাহাৰপুৰ, শশীপুৰ, মেনকা চাহ বাগানৰ পৰা অহা শতাধিক মহিলাই ৰেচন কাৰ্ডৰ বিনিময়ত নূন্যতম পৰিমাণৰো চৰকাৰে প্ৰদান কৰা সূলভ মূল্যৰ সামগ্ৰী লাভ নকৰাৰ অভিযোগ উত্থাপিত কৰে ৷ ইয়াৰ পূৰ্বেও মহিলাসকলে প্ৰতিবাদ সাব্যস্ত কৰিছিল যদিও কোনো সুফল লাভ নকৰিলে ৷ মহিলাসকলে বিভাগীয় কৰ্তৃপক্ষক বহুবাৰ অভিযোগ দাখিল কৰিছিল যদিও কোনো উপযুক্ত ব্যৱস্থা গ্ৰহণ নকৰিলে বিভাগটোৱে ৷
উল্লেখ্য যে, দুবছৰ পূৰ্বে মহিলাসকলে লাভ কৰা ৰেচন কাৰ্ডসমূহ আছিল দুই ধৰণৰ ৷ কোনোৱে যদি কাৰ্ডৰ নামত এখন উকা বহী পাইছে আন কোনোৱে পাইছে প্ৰাক্তন মুখ্যমন্ত্ৰী তৰুণ গগৈৰ ফটো সম্বলিত ৰঙীন ৰেচন কাৰ্ড ৷ মহিলাসকলৰ অভিযোগ অনুসৰি, সুকুমাৰ দাস আৰু কৃষ্ণ দাস নামৰ দুজন লোকে দুবছৰৰ পূৰ্বে বিতৰণ কৰিছিল এই কাৰ্ডসমূহ ৷ ইয়াৰ সমান্তৰালভাৱে মহিলাসকলৰ কাৰ্ড বিফল হৈ পৰা কথাতো এই লোক দুজনেই হঠাতে ঘোষণা কৰে ৷ ইয়াৰ পিচতে সমগ্ৰ অঞ্চলটোৰ মহিলাসকলৰ মাজত হাহাকাৰ পৰিস্থিতিৰ সৃষ্টি হয় ৷
লগতে পঢ়ক: চুৰাইবাৰী আৰক্ষীৰ তৎপৰতাত জব্দ চোৰাং গৰু
