বাক্সা,20 মে’: ৰাজ্যত গৰু চোৰৰ ঘটনা নতুন নহয়, সময়ে সময়ে আৰক্ষী প্ৰশাসনৰ নিদ্ৰা হৰণ কৰি আহিছে গৰু চোৰে ৷ প্ৰতিদিনে অসমৰ পৰা চোৰাং ভাবেই হওঁক অথবা গৰাকীৰ পৰা চোৰ কৰিয়েই হওঁক বাংলাদেশলৈ গৰু সৰবৰাহ কৰা ঘটনা এতিয়া নিতৌ নৈমিত্তিক কাৰ্যত পৰিণত হৈছে । দেওবাৰে নিশা বাক্সা জিলাৰ তামুলপুৰ আৰক্ষী থানাৰ অন্তৰ্গত ডিমলাপাৰত চোৰাং গৰুসহ মাৰুতি ভেন জব্দ কৰিবলৈ সক্ষম হয় আৰক্ষী ৷ নিশা প্ৰায় 1 বজাত তামুলপুৰ আৰক্ষীৰ তহলদাৰী দল এটাই AS০১BY০৮৪১নম্বৰৰ মাৰুতি ভেন এখন তামুলপুৰ মটঙা চকত প্ৰত্যক্ষ কৰি গাড়ীখন ৰখাবলৈ দিয়াত আৰক্ষীৰ নিৰ্দেশ অমান্য কৰি পলাবলৈ চেষ্টা কৰে । শেষত আৰক্ষীয়ে খেদি খেদি তামুলপুৰ ডিমলাপাৰ চকত গাড়ীখন ৰখাবলৈ সক্ষম হয় যদিও গৰু চোৰৰ দলটোৰ লগতে মাৰুতি ভেনখনৰ চালক জন পলাই যায় । আৰক্ষীয়ে তালাচী কৰি গাড়ীখনৰ ভিতৰত ভৰিত বন্ধা অৱস্থাত তিনিটা গৰু উদ্ধাৰ কৰিবলৈ সক্ষম হয় । গাড়ীৰ নম্বৰৰ ওপৰত ভিত্তি কৰি গাড়ীখনৰ গৰাকী বিশ্বজিৎ বিশ্বাসক আৰক্ষীয়ে আটক কৰিবলৈ সক্ষম হৈছে ।
লগতে পঢ়ক: লখিমপুৰত উপায়ুক্তৰ লোকসভা নিৰ্বাচনৰ ভোটগণনা সম্পৰ্কত সংবাদমেল
ইতিমধ্যে তামুলপুৰ আৰক্ষীয়ে গৰু চোৰ আৰু গাড়ী চালকক কৰায়ত্ত কৰাৰ বাবে আৰম্ভ কৰিছে অভিযান । বৰ্তমান তামুলপুৰ আৰক্ষী থানাত গৰু চোৰ হোৱা গৰাকী উপস্থিত হৈ চোৰাং গৰু কেইটা প্ৰত্যক্ষ কৰিবলৈ ভিৰ কৰা পৰিলক্ষিত হৈছে ৷ নিজৰ হেৰুৱা গৰু কেইটা পোৱাৰ আশাত লোকসকলৰ এই ভিৰ দেখা গৈছে তামুলপুৰ আৰক্ষী থানাত ৷
