বাক্সা, 3 অক্টোবৰঃ পৰ্যটকৰ বাবে আহিছে সুখবৰ ৷ বৃহস্পতিবাৰৰ পৰা পৰ্যটকৰ বাবে মুকলি কৰা হ’ব মানাহ ৰাষ্ট্ৰীয় উদ্যানখন ৷ বাক্সা জিলাৰ মানাহ ৰাষ্ট্ৰীয় উদ্যানখনৰ বাঁহবাৰী ৰেঞ্জৰ দ্বিতীয় প্ৰৱেশদ্বাৰ ৪ অক্টোবৰৰ ৰাতিপুৱা ৯ বজাত অনুষ্ঠানিক ভাৱে দৰ্শনাৰ্থী তথা পৰ্যটকৰ বাবে মুকলি কৰিব বিটিচিৰ উপ মুখ্য কাৰ্য্যবাহী সদস্য খাম্ফা বৰগয়াৰীয়ে । এই কথা জানিবলৈ দিছে বাঁহবাৰী ৰেঞ্জৰ ৰেঞ্জাৰ বাবুল ব্ৰক্ষ্মই ৷ উক্ত দিনাই ৰাষ্ট্ৰীয় উদ্যানখনত কেন্দ্ৰীয়ভাবে উদযাপন সাতদিনীয়া কাৰ্যসূচীৰে 1 অক্টোবৰৰ পৰা 7 অক্টোবৰলৈ চলিবলগীয়া 65 সংখ্যক বন্যপ্ৰাণী সপ্তাহৰো উদ্বোধন কৰা হ'ব ৷ চলিত বৰ্ষৰ 15 জুনৰ পৰা পৰ্যটকৰ বাবে সম্পূৰ্ণ ৰূপে বন্ধ কৰি ৰখা হৈছিল ৰাষ্ট্ৰীয় উদ্যানখন ।
উল্লেখ্য যে, 2018-19 বিত্তীয় বৰ্ষত ৰাষ্ট্ৰীয় উদ্যান খনলৈ অহা দৰ্শনাৰ্থীৰ সংখ্যা আছিল 42,329 গৰাকী ইয়াৰে ৪২,৩২৯ গৰাকী দেশীয় পৰ্যটক আৰু 658 গৰাকী বিদেশী পৰ্যটক । যাৰ পৰা উদ্যানখনে অৰ্জন কৰা সৰ্বমুঠ ৰাজহৰ পৰিমাণ আছিল 1,06, 63,500 টকা । ইয়াৰে ভিতৰত দেশীয় পৰ্যটকৰ পৰা 93,58,497 টকা আৰু বিদেশী পৰ্যটকৰ পৰা 6,24, 428 টকা লাভ কৰিছে ৷ লগতে চুবুৰীয়া ৰাষ্ট্ৰ ভূটানৰ যান-বাহনৰ পৰা উদ্যান কৰ্তৃপক্ষই লাভ কৰিবলৈ সক্ষম হৈছিল 6,80,575 টকা । ইতিমধ্যে, ৰাষ্ট্ৰীয় উদ্যানখন পৰ্যটকৰ মুকলি কৰাৰ বাবে বিভিন্ন ৰঙেৰে আটক ধুনীয়াকৈ সজাই পৰাই তুলা হৈছে ।
