বাক্সা,13 অক্টোবৰ: অৱশেষত দেওবাৰে তামুলপুৰ আৰক্ষীয়ে বাক্সা জিলাৰ ভাৰত ভূটান সীমান্তৰ বগাজুলিত উদ্ধাৰ কৰিলে যোৱা 11 অক্টোবৰত গুৱাহাটীৰ পৰা গাড়ীসহ দুৰ্বিত্তই অপহৰণ কৰা জয়দেৱ চৌধুৰীক ৷ তথ্য অনুসৰি গোপন সুত্ৰৰ পৰা পোৱা খবৰৰ ভিত্তিত আজাৰা থানাৰ আৰক্ষী বিষয়া প্ৰাঞ্জল বৰা আৰু তামুলপুৰ মহকুমা আৰক্ষী বিষয়া অসীম কলিতাৰ নেতৃত্বত বগাজুলিৰ ৪নং দোলাপাৰত চলা এক যুটীয়া অভিযান আঞ্চলটোৰ মংগল বড়ো নামৰ এজন লোকৰ ঘৰৰ পৰা পুলিচে উদ্ধাৰ কৰে অপহৃত জয়দেৱক ৷ ইফালে অপহৃত জয়দেৱে দিয়া তথ্যৰ ভিত্তিত আৰক্ষীয়ে মহানগৰীৰ ফটাশিল আমবাৰীৰ পৰা আটক কৰে অপহণকাৰী সুজালাং বড়োক ৷ ধৃত বড়োৰ ঘৰ বাক্সা জিলাৰ চিমলাৰ ডুমৰুবুৰীত বুলি আৰক্ষীৰ সুত্ৰই প্ৰকাশ কৰিছে ৷
উল্লেখযোগ্য যে, 11 অক্টোবৰত বাক্সা জিলাৰ তামুলপুৰ-ঘগ্ৰাপাৰা গড়কাপ্তানী পথৰ তেতেলিগুৰিত পৰিতক্ত অৱস্থাত উদ্ধাৰ হৈছিল জয়দেৱ চৌধুৰীৰ এ এছ 01 জে চি 8801 নম্বৰৰ টুৰিষ্ট পাৰ্মিট থকা এল্ট গাড়ীখন ৷ ইয়াৰ পাছৰে পৰা অপহৰণকাৰীক বিচাৰি অভিযান তীব্ৰতৰ কৰি তুলিছিল আৰক্ষীয়ে আৰু তাৰেই ফলস্বৰূপে দেওবাৰে আৰক্ষীয়ে সফলতা লাভ কৰিবলৈ সক্ষম হয় ৷
