তিনি বছৰে অসম্পূৰ্ণ দিৰিং নদীৰ পকী দলং

পুঁজিৰ অভাৱত সম্পূৰ্ণৰূপে বন্ধ নিৰ্মাণ কাৰ্য ৷ যাতায়তৰ সমস্যাত ককবকাইছে বাক্সাবাসীয়ে ৷

ছপাগুৰি, 28 মে': হাগ্ৰামা মহিলাৰীৰ মডেল বিটিচিৰ উন্নয়নৰ নমুনা ! বাক্সা জিলাৰ গলবিল আঠিয়াবাৰী গড়কাপ্তানী পথৰ বৰিমাখাত দিৰিং নদীৰ ওপৰত বিগত 2016 চনৰ ছেপ্তেম্বৰ মাহত বিটিচিৰ প্ৰধান হাগ্ৰামা মহিলাৰীয়ে এখন পকী দলং নিৰ্মাণৰ আধাৰশিলা স্থাপন কৰিছিল ৷ কিন্তু বিগত বছৰ পৰা আজি পৰ্যন্ত দলংখনৰ নিৰ্মাণৰ কাম সম্পূৰ্ণ নহ'ল ৷

জানিব পৰা মতে বিটিচিৰ উন্নয়ন পুঁজিৰ দ্বাৰা আৱন্টিত দলংখন নিৰ্মাণ বাবে প্ৰায় পোন্ধৰ কোটি টকা নিৰ্ধাৰণ কৰা হৈছিল ৷ প্ৰথম কিছুদিন তীব্ৰ গতিত দলংখনৰ কামো চলিছিল ৷ কিন্তু অভিযোগ অনুসৰি পুঁজিৰ অভাৱত এতিয়া দলংখনৰ নিৰ্মাণ কাৰ্য সম্পূৰ্ণৰূপে বন্ধ হৈ পৰিছে ৷ গুৱাহাটীৰ জনৈক আহমেদ নামৰ ঠিকাদাৰজনে পুঁজিৰ অভাৱত এতিয়া দলঙৰ নিৰ্মাণকাৰ্য বন্ধ ৰখাৰ অভিযোগ স্থানীয় ৰাইজৰ ৷ বছৰ বছৰ ধৰি যাতায়তৰ সমস্যাত জীয়াতু ভুগি থকা বৰিমাখা অঞ্চলৰ ৰাইজে দলঙৰ নিৰ্মাণ কাৰ্য চলাত আনন্দিত হৈছিল যদিও বৰ্তমান নিৰ্মাণ বন্ধ হৈ থকা ৰাইজৰ আশাত চেচাপানী পৰিছে ৷ পুনৰ বাৰিষা কালত যাতায়তৰ ক্ষেত্ৰত অঞ্চলটোৰ ৰাইজে যমৰ যাতনা ভোগ কৰিব লাগিব ৷ জানিব পৰা মতে বিটিচি পৰিষদে বিগত বিত্তীয় বৰ্ষত দলংখনৰ বাবে পুঁজি আৱন্টন নিদিয়াত দলঙৰ নিৰ্মাণ বন্ধ হৈ আছে ৷