বাক্সা, 20 জুলাইঃ বাক্সা জিলাৰ তামুলপুৰ মহকুমাৰ অন্তৰ্গত কুমাৰীকাটা কালানদীৰ ওপৰত থকা টাইগাৰ দলঙত বৃহস্পতিবাৰে এখন ইটা ভৰ্তি ট্ৰাক দুৰ্ঘটনাত পতিত হয় ৷ ট্ৰাকখন গৈ থকা অৱস্থাত দলং খনৰ এটা অংশ ভাঙি যোৱাৰ ফলতেই সংঘটিত হয় এই ভয়ংকৰ দুৰ্ঘটনাটো ৷
ঘটনা অনুসৰি দিনৰ ভাগত কুমাৰীকাটা দিশৰ পৰা এখন ইটা ভৰ্তি AS-০১GC ৪১৬০ নম্বৰৰ এখন ট্ৰাক খৈৰানী ফাললৈ গৈ আছিল ৷ ট্ৰাকখন গৈ থকা অৱস্থাত টাইগাৰ ব্ৰীজ খনৰ মাজ অংশ ভাঙি যোৱাত সংঘটিত হয় দুৰ্ঘটনাটো । উক্ত দুৰ্ঘটনাটোত কথমপি প্ৰাণ ৰক্ষা পৰে ট্ৰাকখনৰ চালক আৰু হেণ্ডিমেন জনৰ । ৰাইজে অভিযোগ কৰা অনুসৰি এই দলংখন বহু বছৰ পুৰণি হোৱা বাবে দলং খনৰ মাজভাগত কেইবাটাও অংশ ভাঙি বৃহৎ গাঁতৰ সৃষ্টি হোৱা পৰিলক্ষিত হয় ।
ইফালে ২০১৮ বৰ্ষত ৩০ লক্ষাধিক টকা ব্যয়ৰে বিধায়ক পুঁজিৰে দলংখনৰ মেৰামতিৰ কাম কৰিছিল যদিও কাম নিম্ন মানৰ হোৱাৰ বাবে কেইমাহ মানৰ পিছতে পুনৰ দলংখনৰ মাজ ভাগত বৃহৎ গাঁতৰ সৃষ্টি হয় । ইয়াৰ ফলতেই দলংখনৰ ওপৰত সঘনাই সৰু-বৰ দুৰ্ঘটনা সংঘটিত হৈ থকা বুলি স্থানীয় লোকে অভিযোগ কৰে । এই বিষয়ে স্থানীয় জন প্ৰতিনিধিক দলং খন মেৰামতিৰ বাবে আহ্বান জনাইছিল যদিও জনপ্ৰতিনিধি গৰাকীয়ে কোনো ধৰণৰ গুৰুত্ব আৰোপ কৰা নাই বুলি অভিযোগ কৰে ৰাইজে । ফলত এনেকৈয়ে দলং খনৰ ওপৰেৰে ভয়ংকৰ যাতায়াত কৰিবলগীয়া হোৱাত এতিয়া শংকিত হৈ পৰিছে ৰাইজ ৷
লগতে পঢ়ক- সংখ্যালঘু ছাত্ৰ বৃত্তি কেলেংকাৰীৰ তদন্ত বিচাৰি চিৰাঙত আমছুৰ প্ৰতিবাদ
