বৰমা, ১৮ নবেম্বৰ : বিটিচি নিৰ্বাচনৰ দিন ঘোষণা কৰাৰ পাচতে তৎপৰ হৈ পৰিছে সাংসদ নৱ কুমাৰ শৰণীয়া নেতৃত্বাধীন গণ সুৰক্ষা পাৰ্টি ৷ বুধবাৰে বাক্সা জিলাৰ মথনগুৰি পৰিষদীয় সমষ্টিৰ চলিকান্দাত অনুষ্ঠিত হয় দলটোৰ এখন বিশাল নিৰ্বাচনী গণ সমাৱেশ ৷ য’ত উপস্থিত থাকে গণ সুৰক্ষা পাৰ্টিৰ সভাপতি তথা কোকৰাঝাৰ লোকসভা সমষ্টিৰ সাংসদ নৱ কুমাৰ শৰণীয়া ৷
সাংসদ শৰণীয়াই শেহতীয়াভাৱে বিজেপি আৰু বিপিএফ দলৰ সংঘাতক স্বামী-স্ত্ৰীৰ মাজৰ কাজিয়া বুলি তীব্ৰ ভাষাৰে কটাক্ষ কৰে ৷ বিজেপি-বিপিএফৰ সংঘাতক লৈ নৱ কুমাৰ শৰণীয়াই কয় যে, তেওঁলোকৰ মাজত কমিচন কম বেছি হোৱা বাবে সংঘাত হৈছে ৷ বিশেষ একো নাই, ৰাইজক দেখুৱাৰ বাবে এনেদৰে কাজিয়া কৰিছে ৷
সমাগত বিটিচি নিৰ্বাচনত গণ সুৰক্ষা পাৰ্টীয়ে 30 খনৰ অধিক আসন লৈ পৰিষদ গঠন কৰিব বুলি দৃঢ়তাৰে জানিবলৈ দিয়ে নৱ কুমাৰ শৰণীয়াই ৷ তেওঁ কয় যে, বিজেপি- বিপিএফ আৰু ইউ পি পি এল দলে দহখনত কৈ বেছি আসন লাভ নকৰে ৷ সাংসদ শৰণীয়াই বিটিচি পৰিষদ গঠন কৰিব পাৰিলে বিটিআৰ চুক্তিৰ আপত্তিজনক দফা সমূহ সালসলনি কৰি চুক্তিখন কাৰ্যকৰী কৰিব বুলিও মন্তব্য কৰে ৷ আনহাতে সাংসদ শৰণীয়াই বিশ্বজিৎ দৈমাৰী বিজেপি যোগদান কৰা কাৰ্যক শুভেচ্ছা প্ৰদান কৰি কয় যে ৰাষ্ট্ৰীয় দলত গৈ তেওঁ নিজৰ শক্তি সামৰ্থ প্ৰয়োগ কৰক ৷ কিন্তু বিটিচি নিৰ্বাচনত কোনো প্ৰভাৱ নপৰে ৷
লগতে পঢ়ক : একালৰ সতীৰ্থই মিছলীয়া আখ্যা দিলে নৱ শৰণীয়াক
