তামুলপুৰ,30 চেপ্টেম্বৰ: বাক্সা জিলাৰ বিজেপিৰ উদ্যোগত কোকৰাঝাৰ লোক সভা সমষ্টিৰ অন্তৰ্গত তামুলপুৰত উচ্চতৰ মাধ্যমিক বিদ্যালয়ৰ প্ৰেক্ষাগৃহত দেওবাৰে বিজেপিৰ এখন জনজাগৰণ সভা অনুষ্ঠিত কৰা হয় । সভাত অংশগ্ৰহণ কৰি ঢেকীয়াজুলী সমষ্টিৰ বিধায়ক তথা জিএম ডিৰ অধ্যক্ষ অশোকানন্দ সিংঘালে বিটিচিত বিজেপিৰ বাদে উন্নয়নৰ কোনো বিকল্প নাই বুলি মন্তব্য কৰে । এন আৰ চি সম্পৰ্কত বক্তব্য প্ৰদান কৰি তেওঁ এই তালিকাক মানি নলয় বুলি জনায় ৷
কাশ্মীৰৰ ৩৭০অনুচ্ছেদ ৩৫(ক) ধাৰা সম্পৰ্কত তেওঁ কয় যে, চৰকাৰে কাশ্মীৰৰ বাবে যিমান টকা পইচা দিলে , তাৰ কোনো হিচাপ নাই । ৮ শতাংশ ভোটাৰে নিৰ্বাচিত কাশ্মীৰ চৰকাৰে ৩৭০ অনুচ্ছেদৰ বাবে দূৰ্নীতি কৰি আছে বুলিও তেওঁ তাৎপৰ্যপূৰ্ণ মতামত আগবঢ়ায় । সভাখনত এমট্ৰণৰ অধ্যক্ষ ঋতুপৰ্ণ শৰ্মাই ভাৰতীয় জনতা পাৰ্টীৰ ইতিহাস আৰু ৩৭০-৩৫(ক)ৰ বিষয়ে বিতং ব্যাখ্যা আগবঢ়ায় ।
