বাক্সা, ২৫ জানুৱাৰী : বিটিআৰ চুক্তিৰ প্ৰথম বৰ্ষপূৰ্তি উপলক্ষে সোমবাৰে বাক্সা জিলাৰ মুছলপুৰত জিলা প্ৰশাসনৰ উদ্যোগত এক সাংস্কৃতিক কাৰ্যসূচী ৰূপায়ন কৰা হয় ৷ এই সাংস্কৃতিক অনুষ্ঠানত উপস্থিত থাকে বিটিচিৰ মুখ্য কাৰ্যবাহী সদস্য প্ৰমোদ বড়ো ৷
ইফালে এক সাংস্কৃতিক কাৰ্যসূচীত অংশ গ্ৰহণ কৰি প্ৰমোদ বড়োৱে সাংবাদিকৰ আগত মন্তব্য কৰে যে, বিটিআৰত থকা প্ৰতিটো জাতি জনগোষ্ঠীৰ সাংস্কৃতিৰ বিকাশত গুৰুত্ব প্ৰদান কৰা হ'ব ৷ গাঁৱে ভূঞে থকা জনগোষ্ঠীয় সাংস্কৃতিক দল সমূহক উলিয়াই আনিবলৈ বিটিচি প্ৰশাসনে কাৰ্যপন্থা গ্ৰহণ কৰিব ৷ বিটিআৰ চুক্তিৰ প্ৰতিটো দফা ৰূপায়নৰ ক্ষেত্ৰত ৰাজ্য চৰকাৰ আৰু কেন্দ্ৰীয় চৰকাৰে দিয়া প্ৰতিশ্ৰুতি অনুসৰিয়েই বিটিআৰ চুক্তি ৰূপায়ন কৰা হ'ব ৷
এই সাংস্কৃতিক সমাৰোহত বড়ো চিখলাৰ বাগৰুম্বা, চাওতালী নৃত্য, গোৰ্খা, বিহু, ৰাভা, হাজং জনগোষ্ঠীৰ বিভিন্ন নৃত্যৰে মুখৰিত হয় মুছলপুৰৰ দুৰ্গা মন্দিৰ চৌহদ ৷ উক্ত অনুষ্ঠানৰ লগত সংগতি ৰাখি এক সাংস্কৃতিক শোভাযাত্ৰা উলিওৱা হয় ৷ এই শোভাযাত্ৰাৰ শুভ উদ্বোধন কৰে বিটিচিৰ মুখ্য কাৰ্যবাহী প্ৰমোদ বড়োৱে ৷ শোভাযাত্ৰাত বিভিন্ন জনগোষ্ঠীৰ সাংস্কৃতিক দলে অংশগ্ৰহণ কৰে ৷ উক্ত কাৰ্যসূচীত বিটিচিৰ মুখ্য কাৰ্যবাহী সদস্য প্ৰমোদ বড়োৰ লগতে বিটিচি পৰিষদৰ অধ্যক্ষ কাতিৰাম বড়োও উপস্থিত থাকে ৷
