স্পৰ্টছ ডেস্ক, 16 নৱেম্বৰ : বিশ্ব ৰেংকিঙৰ দ্বিতীয় স্থানৰ ৰাফেল নাডালে সহজ জয়েৰে এটিপি ফাইনেলছৰ দ্বিতীয় ৰাউণ্ডত প্ৰৱেশ কৰিছে ৷ এঘন্টা 16 মিনিটৰ যুঁজত নাডালে 6-3, 6-4 ছেটত পৰাস্ত কৰে ৰাছিয়াৰ আন্দ্ৰে ৰোবলেভক ৷
জয়ৰ অন্তত নাডালে কয়, "জয়েৰে টুৰ্ণামেন্ট আৰম্ভ কৰাটো যোগাত্মক দিশ, এনে জয়ে পোনপটীয়া ছেটত মেচ দখল কৰিবলৈ আত্মবিশ্বাস বৃদ্ধি কৰে ৷" তেওঁ লগতে কয়, "মই ছাৰ্ভৰ ওপৰত গুৰুত্ব দিছিলো ৷ মই অধিক কষ্ট কৰিব লগা নহ'ল সেয়েহে অধিক আৰামেৰে মেচৰ অন্ত পেলাবলৈ সক্ষম হ'লো ৷"
মঙলবাৰে নাডালে গ্ৰুপৰ দ্বিতীয় মেচত নতুন ইউ এছ অপেন চেম্পিয়ন ডমিনিক থিয়েমৰ বিৰুদ্ধে অৱতীৰ্ণ হ'ব ৷ এই সম্পৰ্কত নাডালে কয়, "এই মেচৰ বাবে মই সম্পূৰ্ণ সাজু হৈ থাকিম ৷ এয়া এক ডাঙৰ প্ৰত্যাহ্বান হ'ব যদিও আজিৰ জয়ে সহায় কৰিব বুলি আশা কৰিছো ৷"
উল্লেখ্য যে, এটিপি ফাইনেলছ টুৰ্ণামেন্টৰ প্ৰথমখন মেচত গ্ৰীচৰ ষ্টেফানোছ টিছিটছিপাচক পৰাস্ত কৰে অষ্ট্ৰিয়াৰ ডমিনিক থিয়েমে ৷ বিশ্ব ৰেংকিঙৰ তৃতীয় স্থানৰ ডমিনিকে 7-6(5), 4-6, 6-3 ছেটত পৰাস্ত কৰে ষষ্ঠ ৰেংকিঙৰ ষ্টেফানোছক ৷ তীব্ৰ প্ৰতিদ্বন্দিতাপূৰ্ণ মেচত দুঘন্টা 17 মিনিটৰ যুঁজত ষ্টেফানোছক পৰাস্ত কৰিবলৈ সক্ষম হয় থিয়েম ৷
লগতে পঢ়ক : এটিপি ফাইনেলছৰ প্ৰথমখন মেচত ডমিনিক থিয়েমৰ হাতত পৰাস্ত ষ্টেফানোছ
