স্পৰ্টছ ডেস্ক, ৭ মে': প্ৰায় এক দশক ধৰি বক্সিঙত ভাৰতক প্ৰতিনিধিত্ব কৰি আহিছে ভাৰতীয় বক্সাৰ সতীশ কুমাৰে । চুপাৰ হেভিৱেট শাখাত প্ৰতিনিধিত্ব দি আহিছে খেলুৱৈগৰাকীয়ে । ২০১৬ ৰ ৰিঅ' অলিম্পিকত স্থান সুনিশ্চিত কৰিবলৈ সক্ষম নোহোৱা সতীশে মাৰ্চ মাহত ৯১ কিল'গ্ৰাম শাখাত টকিঅ' অলিম্পিকলৈ যোগ্যতা অৰ্জন কৰিবলৈ সক্ষম হৈছিল ।
খেলুৱৈগৰাকীয়ে এটা সংবাদ এজেঞ্চিক দিয়া বক্তব্যত কৈছিল, মই অলিম্পিকলৈ যোগ্যতা অৰ্জন কৰি যথেষ্ট আনন্দ উপভোগ কৰিছো । মই অধিক সুখী কাৰণ এই শাখাত যোগ্য়তা অৰ্জন কৰা মই প্ৰথম ভাৰতীয় । মই এই অনুভৱ ব্যক্ত কৰিব নোৱাৰো । এই পৰ্যায়ত উপনীত হোৱা আৰু অলিম্পিকত পদক লাভ কৰা সকলোৰে সপোন থাকে । মোৰ বাবেই এইটো এনেকুৱাই । যোগ্যতা অৰ্জন কৰিলো এতিয়া মোৰ লক্ষ্য পদক জয় কৰাৰ ।
কিন্তু বিশ্বজুৰি সংহাৰী ৰূপ ধাৰণ কৰা COVID-১৯ ৰ ফলতেই ইতিমধ্য়ে অহা বৰ্ষলৈ স্থগিত কৰা হৈছে টকিঅ' অলিম্পিক । যাৰ বাবে এতিয়া ঘৰতে অনুশীলন অব্যাহত ৰাখিছে খেলুৱৈগৰাকীয়ে । ঘৰতে যি সামগ্ৰী উপলব্ধ সেই সমূহৰে অনুশীলন কৰিছে বক্সাৰগৰাকীয়ে । অৱশ্যে অনুশীলন কেম্পৰ দৰে এই সমূহ উপযুক্ত নহয় বুলি কয় সতীশে ।
সতীশে কয়, কেম্পত যি ১০০ শতাংশ অনুশীলন কৰিব পৰা যায় সেইয়া ঘৰত সম্ভৱ নহয় । ঘৰত যি সামগ্ৰী আছে তাৰে কেৱল ৬০-৭০ শতাংশ হে অনুশীলন কৰিবলৈ পাৰি । বৰ্তমানলৈকে একো সঠিক হোৱা নাই । ভাৰতীয় বক্সিং ফেডাৰেচনে পৰিকল্পনা তৈয়াৰ কৰিছে অনুশীলনৰ বাবে ক'ত যাব লাগিব । কিন্তু লক্ ডাউন শেষ নোহোৱা পৰ্যন্ত কোনো নিৰ্ধাৰণ কৰা হোৱা নাই ।
এতিয়া সেইখিনি অনুশীলন কৰি আছো যিবোৰ প্ৰশিক্ষকে মোক কৰিবলৈ কৈছে । প্ৰত্যেক দিনাই বেলেগ-বেলেগ অনুশীলনৰ কাৰ্যক্ৰম থাকে । জীম নথকাৰ বাবে ৰছী, টায়াৰ ইত্যাদিৰে ঘৰতে অনুশীলন কৰিছো বুলি উল্লেখ কৰে বক্সাৰগৰাকীয়ে ।
