আইজল, ৫ মাৰ্চ: শনিবাৰে অৰ্থাৎ অহা ৬ মাৰ্চত মিজোৰামৰ আইজলত অনুষ্ঠিত হ'ব বিশ্ব বক্সিং পৰিষদৰ যুৱ বিশ্ব চুপাৰ ফেডাৰৱেইট শীৰ্ষক প্ৰতিযোগিতা । প্ৰথমবাৰৰ বাবে ৰাজ্যখনত পেছাদাৰী বক্সিং প্ৰতিযোগিতা অনুষ্ঠিত কৰা হ'ব । যোৱা ১৫ জানুৱাৰীত বিশ্ব বক্সিং পৰিষদৰ চেম্পিয়নশ্বিপ কাৰ্যসূচীৰ অধ্যক্ষ ৰেক্স ৰ'জ ৱাকাৰে ৰাজ্যখনত পেছাদাৰী বক্সিং অনুষ্ঠিত কৰাৰ বাবে এল পি এছ ভিজন প্ৰডাকছন আৰু তেওঁলোকৰ সংগী, গ্ৰাছৰুট বক্সিং প্ৰ'ম'ছন এণ্ড মেনেজমেণ্টক অনুমতি প্ৰদান কৰিছিল ।
এক সংবাদমেল সম্বোধন কৰি এল পি এছ নৈশ যুঁজৰ আয়োজকে প্ৰকাশ কৰিছে যে, শনিবাৰে নিশা ৮ বজাত আইজলৰ মুৱালপুইস্থিত আৰ ডেংথুৱামা ইন্দৰ ষ্টেডিয়ামত ঘানাৰ এৰিক কুৱাৰ্মৰ বিৰুদ্ধে যুঁজ দিব মিজোৰামৰ লাৰিনছাংগা লাউৱে । অনুষ্ঠানটো আয়োজন কৰাৰ বাবে ৫ হাজাৰ মাৰ্কিন ডলাৰ ব্যয় হ'ব বুলি জানিবলৈ দিছে আয়োজকে । প্ৰথমবাৰৰ বাবে মিজোৰামৰ ৫ গৰাকী পেছাদাৰী বক্সাৰে পেছাগত প্ৰতিযোগিতাত অংশগ্ৰহণ কৰিব ।
মিজো বক্সাৰ ৫ গৰাকীসহ মুঠ ৯ জন বক্সাৰ, ঘানাৰ ৩ জন বক্সাৰৰ লগতে আফগানিস্তানৰ বক্সাৰেও এই প্ৰতিযোগিতাত অংশগ্ৰহণ কৰিব । মূল প্ৰতিযোগিতা বিশ্ব বক্সিং পৰিষদৰ যুৱ বিশ্ব চেম্পিয়নশ্বিপ ৮টা পৰ্যায়ত অনুষ্ঠিত হ'ব । ৫৯ কেজিৰ শাখাত ভাৰতৰ লাৰিনছাংগা লাউ আৰু ঘানাৰ এৰিক কুৱাৰ্মৰ মাজত প্ৰতিযোগিতা অনুষ্ঠিত হ'ব । ২১ বছৰীয়া লাৰিনছাংগা লাউ মিজোৰামৰ এগৰাকী সুদক্ষ বক্সাৰ, যিয়ে পেছাদাৰী বক্সিংত দক্ষতা প্ৰদৰ্শন কৰিবলৈ সক্ষম হৈছে ।
বিগত বৰ্ষৰ ৯ মাৰ্চত ডুবাইত অনুষ্ঠিত পেছাদাৰী বক্সিং প্ৰতিযোগিতাত তেওঁ টাঞ্জানিয়ান বক্সাৰ হাইদ্ৰী অমচাঞ্জ'ৰ বিৰুদ্ধে যুঁজ দিছিল আৰু ৬টা পৰ্যায়ত জয়ী হৈছিল । ইয়াৰ পিছতে তেওঁ বিশ্ব বক্সিং পৰিষদৰ যুৱ বিশ্ব চেম্পিয়নশ্বিপৰ বাবে যুঁজ দিয়াৰ যোগ্যতা অৰ্জন কৰে । চলিত বৰ্ষৰ ৩০ জানুৱাৰীত মুম্বাইত তেওঁ প্ৰিন্স শ্ৰীবাস্তৱক পৰাস্ত কৰে । আনহাতে, ঘানাৰ ২৩ বছৰীয়া বক্সাৰ এৰিক কুৱাৰ্মে ৫ খন পেছাদাৰী বক্সিং প্ৰতিযোগিতাত অংশ লৈছে আৰু ইয়াৰে চাৰিখনত জয়ী হৈছে ।
২০১৯ চনত তেওঁ নাইজেৰিয়াৰ চেম্পিয়ন ৰিয়েল ৱান ওলাড'চুৰ বিৰুদ্ধে যুঁজ দি জয় লাভ কৰে । মিজোৰামত অনুষ্ঠিত হ'বলগীয়া প্ৰতিযোগিতাত ফেডাৰৱেইটৰ ৫৭ কেজিৰ শাখাত অংশ ল'ব ভাৰতৰ অছদ আছিফ খান আৰু আফগানিস্তানৰ এইমল আহমেদ ছেদিক জাদালে । ছুপাৰ ৱেলটাৰৱেইটৰ ৬৯.৯ কেজিৰ শাখাত ডি আৰ কংগ'ৰ অছেফ ইমানুৱেল জিংদু আৰু ভাৰতৰ চি লালৰুইটলুৱাংগাৰ মাজত প্ৰতিযোগিতা অনুষ্ঠিত হ'ব । ছুপাৰ লাইটৱেইটৰ ৬৩.৫ কেজিৰ শাখাত ভাৰতৰ ৰাকেশ কৃষ্ণণৰ বিৰুদ্ধে ভানলালাওম্পুইয়াই যুঁজ দিব । ছুপাৰ বন্টামৱেইটৰ ৫৫.৩ কেজিৰ শাখাত মঝৰ হুছেইন আৰু এফ জ'ৰামচানাৰ মাজত প্ৰতিযোগিতা অনুষ্ঠিত কৰিব ।
ৱেলটাৰৱেইটৰ ৬৬.৭ কেজিৰ শাখাত ৰোহিত চৌধুৰীয়ে এই চি লালৰামফেলাৰ বিৰুদ্ধে প্ৰতিযোগিতাত অৱতীৰ্ণ হ'ব । ভাৰতীয় বক্সিং পৰিষদৰ মুৰলীয়ে প্ৰতিযোগিতাৰ তত্বাৱধান কৰিব । জম্মু-কাশ্মীৰৰ বিশ্ব বক্সিং পৰিষদৰ চিকিৎসক সংযোগিতা ছুদানো উপস্থিত থাকিব । মনোজ পানৱাৰ ৰেফাৰী হিচাপে থকাৰ উপৰিও বিচাৰকৰ আসন অলংকৃত কৰিব অজয় ছালৱি, সুৰেশ বাৰ্মা আৰু এম ডি আলীয়ে ।
লগতে পঢ়ক:আই পি এল-২০২১: চেন্নাইত উপস্থিত ধোনী
