স্পৰ্টছ ডেস্ক, 28 ছেপ্টেম্বৰ: ছয়বাৰৰ বিশ্ব চেম্পিয়ন ভাৰতীয় বক্সিং তাৰকা মেৰী কমে অলিম্পিকৰ স্বৰ্ণ পদক জয়ৰ লক্ষ্য বান্ধি লৈছে ৷ বৰ্তমানলৈকে অলিম্পকৰ স্বৰ্ণ দখল কৰিবলৈ সক্ষম নোহোৱা বাবে পূৰ্বৰ সকলো সফলতাইও সুখী কৰিব পৰা নাই বক্সাৰগৰাকীক ৷
এই সম্পৰ্কত তাৰকা বক্সাৰগৰাকীয়ে মন্তব্য কৰে,"বৰ্তমানলৈকে অলিম্পকত পদক দখল কৰিছো যদিও স্বৰ্ণ দখল কৰিবলৈ সক্ষম হোৱা নাই ৷ সেয়েহে মই সন্তুষ্ট নহয় আৰু মই এতিয়াও ভোকাতুৰ ৷ মই সন্তুষ্ট নহয় বাবেই কঠোৰ পৰিশ্ৰম অব্যাহত ৰাখিছো ৷ অলিম্পিকত স্বৰ্ণ জয় কৰিবলৈ সক্ষম হ'লেহে মই সুখী হ'ম ৷"
লগতে তেওঁ কয়,"সমগ্ৰ দেশো তেতিয়াহে সুখী হ'ব ৷ এয়াই মোৰ সপোন ৷ মোৰ হাতত অলিম্পকৰ টাটু তৈয়াৰ কৰিছো আৰু জয় লাভ কৰিবৰ বাবে প্ৰচেষ্টা অব্যাহত ৰাখিছো ৷" বিশ্ব চেম্পিয়নশ্বিপৰ বাবে মাজত কিছু সময়হে বাকী থকা অৱস্থাত তেওঁ মন্তব্য কৰে যে,এই প্ৰতিযোগিতাত পুনৰ স্বৰ্ণ জয়েৰে সপ্তম সংখ্যক বিশ্ব চেম্পিয়ন হ'ব বিচাৰে তেওঁ ৷
ইয়াৰোপৰি,ৰাজনীতিত যোগ দিয়াৰ বিষয়ে উঠা প্ৰশ্নৰ উত্তৰত তেওঁ কয় যে,বৰ্তমান এই সম্পৰ্কত কোনো সিদ্ধান্ত গ্ৰহণ কৰা নাই ৷ আগন্তুক প্ৰতিযোগিতাসমূহৰ ওপৰতহে গুৰুত্ব আৰোপ কৰিছে বুলি মন্তব্য কৰে তেওঁ ৷ অৱসৰ গ্ৰহণৰ পাছতহে ৰাজনীতি সম্পৰ্কত মন্তব্য কৰিব বুলি উল্লেখ কৰে মেৰী কমে ৷
