স্পৰ্টছ ডেস্ক, 15 জুনঃ আগন্তুক টকিঅ' অলিম্পিক সন্দৰ্ভত ভাৰতৰ প্ৰসিদ্ধ মল্লযুঁজাৰু খেলুৱৈ বজৰং পুনীয়াৰ সৈতে ইটিভি ভাৰতৰ এক আছুতীয়া সাক্ষাৎকাৰ । এই সাক্ষাৎকাৰতেই পুনীয়াই মনৰ ইচ্ছা প্ৰকাশ কৰে । আগন্তুক টকিঅ' অলিম্পিকত অভিনৱ বিন্দ্ৰাৰ সোণ পদক অৰ্জৰ মূহুৰ্তৰ পুনৰাবৃত্তি কৰাৰ ইচ্ছা প্ৰকাশৰ কথা উল্লেখ কৰে খেলুৱৈগৰাকীয়ে ।
টকিঅ' অলিম্পিকত ভাৰতৰ বাবে দ্বিতীয়টো ব্য়ক্তিগত সোণৰ পদক আশা কৰা হৈছে বজৰং পুনীয়াৰ পৰা । উল্লেখ্য় যে, 130 কোটি জনসাধাৰণ থকা ভাৰতবৰ্ষই বৰ্তমানলৈকে অলিম্পিকত মাত্ৰ এটা হে ব্যক্তিগত সোণৰ পদক লাভ কৰিবলৈ সক্ষম হৈছে । 2008 চনত বেইজিং অলিম্পিকত এই কৃতিত্ব লাভ কৰিছিল অভিনৱ বিন্দ্ৰাই ।
পুনীয়াই কয়, মই মোৰ দেশবাসীৰ ওচৰত কৃতজ্ঞ আৰু সন্তুষ্টি লাভ কৰো যে, দেশবাসীয়ে মোৰ পৰা অলিম্পিকত গৌৰৱৰ বাবে অপেক্ষাৰত । তেওঁলোকৰ আশাৰ অৰ্থ হৈছে মোৰ ওপৰত তেওঁলোকৰ বিশ্বাস । অভিনৱ বিন্দ্ৰাই 2008 গ্ৰীষ্মকালীন গেমছত যি কৰি দেখুৱালে তাৰ পুনৰাবৃত্তি কৰাৰ যথোপযুক্ত চেষ্টা কৰিম । পুনীয়া বৰ্তমান 65 কিলোগ্ৰাম শাখাত বিশ্বৰ দ্বিতীয় ৰেংকিঙত থকা খেলুৱৈ ।
আনহাতে লক্ ডাউনক লৈ পুনীয়াই কয়, ভাৰত চৰকাৰ আৰু চিকিৎকৰ দ্বাৰা প্ৰদান কৰা সকলো নিৰ্দেশাৱলী তেওঁ পালন কৰি আহিছে । ইপিনে যেতিয়াৰ পৰাই লক্ ডাউন বলৱৎ কৰা হৈছিল তেওঁ ঘৰৰ বাহিৰলৈ ওলাই যোৱা নাই বুলি জানিবলৈ দিয়ে । ঘৰতে থাকি প্ৰশিক্ষণ গ্ৰহণ কৰা বুলি উল্লেখ কৰে । কাৰণ ইতিমধ্যে মল্লযুঁজৰ সকলো প্ৰতিযোগিতা বাতিল কৰা হৈছে বুলি কয় পুনীয়াই ।
এছিয়ান আৰু কমনৱেলথ গেমছত স্বৰ্ণ পদক জয়ী খেলুৱৈগৰাকীয়ে তেওঁৰ অনুশীলন সুন্দৰকৈ চলি আছে আৰু তেওঁ নিজৰ দুৰ্বলতাৰ ওপৰত কাম কৰি আছে বুলি জানিবলৈ দিয়ে । কেৱল অনুশীলনৰ সময়ত সতীৰ্থ খেলুৱৈ সকললৈ মনত পৰা বুলি কয় পুনীয়াই ।
খেলৰত্ন বিজয়ী খেলুৱৈগৰাকীয়ে কেৰিয়াৰৰ স্মৰণীয় মূহুৰ্ত হিচাপে জীৱনৰ প্ৰথমটো পদক অৰ্জন কৰা 2013 চনৰ বিশ্ব চেম্পিয়নশ্বিপৰ সময়টো বুলি উল্লেখ কৰে । সেই সময়ত তেওঁৰ বয়স 18 ৰ পৰা 19 আছিল বুলি কয় খেলুৱৈগৰাকীয়ে । আনহাতে কেৰিয়াৰৰ আটাইতকৈ বেয়া দিনটোৰ সন্দৰ্ভত 2015 চনৰ মল্লযুঁজ চেম্পিয়নশ্বিপৰ কথা উল্লেখ কৰে পুনীয়াই । য'ত অন্তিম 12 ছেকেণ্ডৰ ভিতৰত বিৰোধী পক্ষৰ হাতত পৰাজয়ৰ সন্মুখীন হ'বলগীয়া হৈছিল খেলুৱৈগৰাকীয়ে ।
আনহাতে পুনীয়াৰ এই সমূহ সফলতাৰ আঁৰত পিতৃৰ সংঘৰ্ষৰ বিষয়ে পুনীয়াই কয়, মোৰ পৰিয়ালে মোৰ বাবে যথেষ্ট কৰিছে । তেওঁলোকেই হৈছে মোৰ প্ৰথম শিক্ষক । মই এজন সাধাৰণ পৰিয়ালৰ পৰা অহা । পিতৃৰ কোনো চাকৰি নাছিল, তেওঁ এজন কৃষক আছিল । কিন্তু যেতিয়াই তেওঁৰ কিবা প্ৰয়োজন হৈছিল তেতিয়াই পিতৃয়ে সেই প্ৰয়োজন পূৰণ কৰিছিল বুলি কয় পুনীয়াই ।
টকিঅ' অলিম্পিকৰ বিলম্বক খেলুৱৈগৰাকীয়ে যোগাত্মক ভাৱে গ্ৰহণ কৰি সময়সূচী অনুসৰি প্ৰতিযোগিতাৰ বাবে সাজু আছে বুলি উল্লেখ কৰে । লগতে প্ৰথমে কৰ'ণা ভাইৰাছক পৰাজিত কৰি তাৰ পাচতে অলিম্পিক, খেলৰ কথা চিন্তা কৰিব লাগে বুলি মতপোষণ কৰে পদ্মশ্ৰী সন্মান প্ৰাপ্ত প্ৰসিদ্ধ ভাৰতীয় খেলুৱৈগৰাকীয়ে ।
লগতে পঢ়ক : সুশান্ত সিং ৰাজপুটৰ মৃত্যু সন্দৰ্ভত ক্ৰিকেটাৰ ৰবীন উথাপ্পাৰ প্ৰতিক্ৰিয়া
