গুৱাহাটী, 12 নৱেম্বৰ : গুৱাহাটীৰ ৰূপনগৰস্থিত শ্ৰী শ্ৰী বৃন্দাবন সেৱাশ্ৰমত তিনিদিনীয়াকৈ অনুষ্ঠিত হোৱা প্ৰথম অল আছাম মুকলি স্পৰ্ট কিক বক্সিং চেম্পিয়নশ্বিপ, ২০১৯ ৰ অন্ত পৰে ৷ চেম্পিয়নশ্বিপত Semi Contact, Light Contact, Full Contact, K1 Rules Cadet আদি বিভিন্ন কেটেগৰীত পুৰুষ আৰু মহিলা উভয়ৰে খেল অনুষ্ঠিত কৰা হয় ৷ প্ৰতিযোগিতাত অসমৰ প্ৰতিখন জিলাৰে প্ৰায় ১০০ গৰাকী খেলুৱৈয়ে অংশগ্ৰহণ কৰে ৷
প্ৰথম দিনাৰ কাৰ্যসূচী হিচাপে খেলুৱৈসকলৰ ওজন পৰীক্ষা কৰা হয় । দ্বিতীয় দিনা খেলুৱৈসকলৰ মাজত প্ৰাৰম্ভিক পৰ্যায়ৰ খেল অনুষ্ঠিত কৰাৰ লগতে তৃতীয় দিনা চূড়ান্ত খেল অনুষ্ঠিত কৰা হয় আৰু বিজয়ীসকলক মেডেল আৰু বঁটা প্ৰদান কৰা হয় । এই অনুষ্ঠানত উপস্থিত থাকে অল ইণ্ডিয়াৰ টেকনিকেল ডাইৰেক্টৰ শুভম চৌধুৰী, আস্কা (AASKA) ৰ অল আসাম টেকনিকেল ডাইৰেক্টৰ প্ৰশান্ত কুমাৰ দাস, আস্কাৰ সাধাৰণ সম্পাদক ঝংকাৰ গগৈৰ লগতে আস্কাৰ অন্যান্য বিষয়ববীয়াসকল ৷
আস্কাৰ উদ্যোগত অনুষ্ঠিত এই চেম্পিয়নশ্বিপত যোৰহাট জিলাই প্ৰথম শ্ৰেষ্ঠ দল, তিনিচুকীয়া জিলাই দ্বিতীয় শ্ৰেষ্ঠ দল, ধনশিৰি মহকুমাৰ বৰপথাৰৰ মিৰাজ আলিয়ে শ্ৰেষ্ঠ পুৰুষ বক্সাৰ, তিনিচুকীয়াৰ গংগা শৰ্মাই শ্ৰেষ্ঠ মহিলা বক্সাৰৰ সন্মান লাভ কৰিবলৈ সক্ষম হয় । এই চেম্পিয়নশ্বিপত বিজয়ী খেলুৱৈসকলে মুম্বাইত অনুষ্ঠিত হ'বলগা নেশ্বনেল স্পৰ্ট কিক বক্সিং চেম্পিয়নশ্বিপত অসমৰ হৈ অংশগ্ৰহণ কৰিব বুলি আস্কাৰ বিষয়ববীয়াসকলে জানিবলৈ দিয়ে ৷
আৰু পঢ়ক : অস্তিত্বৰ সংকটত বটদ্ৰৱাৰ কোবাই কটা সত্ৰঃ সত্ৰৰ ভূমিত নিৰ্মাণ হৈছে মছজিদ
