স্পৰ্টছ ডেস্ক, ২১ মে': বুধবাৰে আইএছএলৰ কেৰালা ব্লাষ্টাৰ্ছ দলৰ পৰা অব্যাহতি ল'লে কেৰালা ব্লাষ্টাৰ্ছৰ লগতে ৰাষ্ট্ৰীয় দলৰ ৰক্ষণশীল খেলুৱৈ সন্দেশ ঝিংগানে । কেৰালা ব্লাষ্টাৰ্ছ দলৰ সৈতে ৬ বছৰৰ বাবে চুক্তিবদ্ধ হৈ থকাৰ পাচত দল ত্যাগ খেলুৱৈগৰাকীৰ ।
জানিব পৰা মতে, ভাৰতীয় দলৰ ৩৬ নম্বৰৰ কেপ লাভ কৰা খেলুৱৈগৰাকীয়ে কোনো বিদেশী লীগত অংশ গ্ৰহণৰ সুযোগ লাভ কৰিছে অথবা বিদেশত সুযোগ লাভৰ বাবে এই সিদ্ধান্ত গ্ৰহণ কৰিছে । উল্লেখ্য যে, এএফচি কাপ, ২০১৯ ৰ পিচত কাটাৰ ক্লাৱ এল-ঘৰাফা এছচিয়ে ঝিংগানৰ প্ৰতি আগ্ৰহ প্ৰকাশ কৰিছিল ।
শীৰ্ষ সংবাদ এজেঞ্চীৰ মতে কেৰালা ব্লাষ্টাৰ্ছৰ ফালৰ পৰাও এই কথা স্পষ্ট কৰা হৈছে । ক্লাৱটোৰ কৰ্তৃপক্ষৰ ফালৰ পৰা কোৱা হৈছে যে, এই ক্লাৱৰ সৈতে সন্দেশ ঝিংগান আৰু জড়িত হৈ নাথাকে । দুয়ো পক্ষৰ চুক্তি মৰ্মে এই সিদ্ধান্ত গ্ৰহণ কৰা হৈছে ।
ঝিংগানে কেৰালা ব্লাষ্টাৰ্ছ দলত এজন প্ৰৱল ৰক্ষণশীল খেলুৱৈৰ ভূমিকা পালন কৰাৰ লগতে দলটোক আইএছলত দুবাৰকৈ ফাইনেলত উত্তীৰ্ণ কৰোৱাত গুৰুত্বপূৰ্ণ ভূমিকা পালন কৰিছিল । তিনি বছৰ পূৰ্বে ঝিংগান আইএছএলত আটাইতকৈ বেছি ধনৰাশী লাভ কৰা ভাৰতীয় ডিফেণ্ডাৰ খেলুৱৈ আছিল । ২০১৯-২০ বৰ্ষত আঘাতৰ বাবে আইএছএলত এখনো মেচত অৱতীৰ্ণ হোৱা নাছিল ঝিংগান । ফলত দলটোৱে সপ্তম স্থান দখল কৰিবলৈ সক্ষম হৈছিল ।
শেহতীয়াকৈ কেৰালা ব্লাষ্টাৰ্ছে মোহন বাগান আই-লীগৰ বিজয়ী প্ৰশিক্ষক কিবু ভিকুনাক আগন্তুক ছীজনৰ প্ৰশিক্ষকৰ বাবে চুক্তিবদ্ধ কৰিছে ।
