স্পৰ্টছ ডেস্ক, 20 জুনঃ আগন্তুক আই এছএল ছীজনৰ বাবে এবছৰৰ বাবে বেংগালুৰু এফ চি দলৰ সৈতে চুক্তিবদ্ধ হ'ল ব্ৰাজিলিয়ান ষ্ট্ৰাইকাৰ চিটন ছিল্ভা । পোন প্ৰথমে এবছৰৰ বাবে চুক্তিবদ্ধ কৰা হৈছে যদিও খেলুৱৈগৰাকীয়ে পৰৱৰ্তী সময়ত ইয়াৰ ম্যাদ বৃদ্ধি কৰিব পাৰে ।
33 বছৰীয়া খেলুৱৈগৰাকীয়ে প্ৰথমবাৰৰ বাবে ব্ৰাজিলৰ মদুৰীৰা ক্লাৱৰ হৈ নিজৰ ফুটবল কেৰিয়াৰ আৰম্ভ কৰিছিল । ইয়াৰ পাচত তেওঁ থাইলেণ্ড,মেক্সিকো,চীনৰ বহু কেইটা ক্লাৱৰ হৈও অৱতীৰ্ণ হয় ।
আনকি থাইলেণ্ড লীগত 100 টা গ'ল কৰা প্ৰথমগৰাকী বিদেশী খেলুৱৈৰ কৃতিত্ব লাভ কৰিছিল ছিল্ভাই । আনহাতে লীগ একৰ দুটা ছীজনত সৰ্বাধিক গ'ল কৰা খেলুৱৈও আছিল ছিল্ভা ।
এই চুক্তিৰ পাচতেই খেলুৱৈগৰাকীয়ে প্ৰতিক্ৰিয়া প্ৰকাশ কৰি কয়,মই বেংগালুৰু এফচিৰ সৈতে এই বাবেই চুক্তিবদ্ধ হৈছো কাৰণ মই চেম্পিয়ন হ'বলৈ বিচাৰো । ক্লাৱটোৰ সৈতে জড়িত হ'বলৈ এইটো এটা সুন্দৰ সুযোগ আছিল । মই ক্লাৱ আৰু তেওঁলোকৰ অনুৰাগীক আনন্দ প্ৰদান কৰিবলৈ বিচাৰো । মই বেংগালুৰুত উপস্থিত হ'বলৈ আৰু দলটোৰ সৈতে জড়িত হ'বলৈ উৎসাহিত হৈ আছো ।
লগতে চাওকঃ প্ৰসংগ ভাৰত-চীনঃ উত্তৰ পূৰ্বাঞ্চল ঘাটিত সাজু বায়ু সেনা
