স্পৰ্টছ ডেস্ক, 28 অক্টোবৰ : ধৰমশালাত হিমাচল প্ৰদেশ ক্ৰিকেট এছচিয়েশ্যন ষ্টেডিয়ামত শনিবাৰে অনুষ্ঠিত হোৱা চলিত ক্ৰিকেট বিশ্বকাপৰ 27 সংখ্যক খেলখনত নিউজীলেণ্ডৰ বিৰুদ্ধে 5 ৰাণত জয়লাভ কৰিছে অষ্ট্ৰেলিয়াই ৷ 389 ৰাণৰ বিজয় লক্ষ্য আগত লৈ কিৱি দলে নিৰ্দ্ধাৰিত 50 অভাৰত 9 টা উইকেট হেৰুৱাই 383 ৰাণহে কৰিবলৈ সক্ষম হয় ৷ ট্ৰেভিছ হেড মেন অব দ্য মেচ বিবেচিত হয় ৷
389 ৰাণৰ বিজয় লক্ষ্য আগত লৈ নিউজীলেণ্ডে এক শক্তিশালী আৰম্ভণি কৰিছিল ৷ ৰাচিন ৰবীন্দ্ৰৰ শতৰাণ, ডাৰেল মিছেল আৰু জেমছ নিচামৰ অৰ্ধশতৰাণৰ সহায়ত দলটো প্ৰায় বিজয় লক্ষ্যত উপনীত হৈছিল যদিও অষ্ট্ৰেলিয়াৰ বিৰুদ্ধে 5 ৰাণত পৰাজয় স্বীকাৰ কৰে দলটোৱে ৷ দলৰ হৈ ৰাচিন ৰবীন্দ্ৰই সাৰ্বাধিক 116 ৰাণ কৰাৰ বিপৰীতে জেমছ নিছামে 39 টা বলত 58 ৰাণ সংগ্ৰহ কৰি পেভিলিয়নমুখী হয় ৷ উইল ইউঙে 32 ৰাণ কৰাৰ বিপৰীতে ডেভন কনৱেই সংগ্ৰহ কৰে 28 ৰাণ ৷ ডাৰেল মিছেলে সংগ্ৰহ কৰে 54 ৰাণ ৷
অষ্ট্ৰেলিয়াৰ হৈ আডাম জাম্পাই সাৰ্বাধিক 3 টা উইকেট দখল কৰে ৷ অধিনায়ক পেট কামিনছ আৰু জ’ছ হেজেলউডে 2 টাকৈ উইকেট দখল কৰে ৷ গ্লেন মেক্সৱেলে দখল কৰে 1টা উইকেট ৷
