স্পৰ্টছ ডেস্ক,১৬ মাৰ্চ: শেহতীয়াকৈ ভাৰতীয় দলৰ কেইবাগৰাকী যুৱ ক্ৰিকেটাৰে সুন্দৰ প্ৰদৰ্শনেৰে দলটোক শক্তিশালী কৰাত সহায় কৰিছে । যুৱ ক্ৰিকেটাৰ সকলৰ উন্নত প্ৰদৰ্শনে দৃষ্টি কাঢ়িছে প্ৰাক্তন ক্ৰিকেটাৰসকলৰো । প্ৰাক্তন ক্ৰিকেটাৰ চাবা কৰিমে দুজন যুৱ ক্ৰিকেটাৰ ক্ৰমে ঋষভ পণ্ট আৰু ইশান কিষাণক প্ৰশংসা কৰা দেখা গ'ল ।
তেওঁৰ মতে প্ৰতিভাৱান খেলুৱৈ দুগৰাকীয়ে ভাৰতৰ হৈ টি-২০, এদিনীয়া আৰু টেষ্ট অৰ্থাৎ সকলো ফৰ্মেটতে স্থান লাভ কৰিবলৈ সক্ষম হ'ব । শেহতীয়াকৈ হৈ যোৱা অষ্ট্ৰেলিয়াৰ বিৰুদ্ধে টেষ্টত ঋষভৰ সুন্দৰ প্ৰদৰ্শন লগতে সীমিত অভাৰৰো তেওঁৰ প্ৰদৰ্শনৰ প্ৰশংসা কৰে চাবা কৰিমে । লগতে ইংলেণ্ডৰ বিৰুদ্ধে ইশান কিষাণে তেওঁৰ প্ৰথমখন টি-২০ত দেওবাৰে শ্বাসৰুদ্ধকৰ অৰ্ধ শতক কৰাৰ কথাও স্মৰণ কৰে প্ৰাক্তন ক্ৰিকেটাৰ গৰাকীয়ে ।
পণ্ট আৰু কিষাণৰ দৰে খেল জয় কৰিব পৰা ক্ষমতা থকা খেলুৱৈৰ সংযোজন ভাৰতীয় দলটোৰ বাবে গৌৰৱৰ কথা বুলিও উল্লেখ কৰে ক্ৰিকেটাৰ গৰাকীয়ে । দুয়োগৰাকীয়ে ১৯ বছৰ অনুৰ্ধৰ ভাৰতীয় দলটোৰ হৈ খেলি তেওঁলোকৰ স্থিতি মজবুত কৰি ৰাখিছে । সেয়ে দুয়োগৰাকী খেলুৱৈ ভাৰতীয় দলটোৰ হৈ সকলো ফৰ্মেটত খেলাৰ যোগ্য বুলি দাবী কৰে প্ৰাক্তন ক্ৰিকেটাৰ চাবা কৰিমে ।
লগতে পঢ়ক: বুমৰাহ-সঞ্জনাক শুভেচ্ছাৰে উপচালে ভাৰতীয় ক্ৰিকেটাৰে
