স্পৰ্টছ ডেস্ক, 31মে’ : অপেক্ষাৰ অন্ত পেলাই ইংলেণ্ডত আৰম্ভ হৈছে আই চি চিৰ দ্বাদশ সংখ্যক এদিনীয়া বিশ্বকাপ ৷ বিশ্বৰ আগশাৰীৰ 10 টা প্ৰতিদ্বন্দিতা দলে আগবঢ়াইছে এইবাৰৰ বিশ্বকাপত ৷ ইতিমধ্যে হট ফেভাৰিট দলৰ মাজত আছে বিৰাট নেতৃত্বাধীন ব্লু বাহিনী ৷
উল্লেখ্য যে, দুবাৰকৈ বিশ্বকাপ চেম্পিয়ন ৱেষ্ট ইণ্ডিজক পৰাস্ত কৰি 1983 চনত পোন প্ৰথমবাৰৰ বাবে ভাৰতে কপিল দেৱৰ নেতৃত্বত বিশ্বকাপৰ খিতাপ জয় কৰিবলৈ সক্ষম হৈছিল ৷ আনহাতে 2011 চনত মহেন্দ্ৰ সিং ধোনীৰ নেতৃত্বত দ্বিতীয়বাৰৰ বাবে ভাৰতে জয় কৰিছিল বিশ্বকাপৰ খিতাপ ৷ কিন্তু এই দুই মধুৰ স্মৃতিৰ মাজতে এটা সময় আছে যিটো কোনো ক্ৰিকেটপ্ৰেমীয়ে অৱলোকন কৰিবলৈ ইচ্ছা প্ৰকাশ নকৰে ৷
2007 বিশ্বকাপঃ 2007 বিশ্বকাপ হৈছে ভাৰতীয় ক্ৰিকেট দলৰ বাবে এক ক'লা অধ্যায় ৷ ৰাহুল দ্ৰাবিড়ৰ নেতৃত্বত ভাৰতীয় দলটোৱে গ্ৰুপ ষ্টেজতেই পৰাজয়বৰণ কৰি টুৰ্ণামেণ্টৰ পৰা বাহিৰ হৈছিল ৷ ভাৰতীয় দলটোৱে বাংলাদেশ আৰু শ্ৰী লংকাৰ বিৰুদ্ধে পৰাজয়ৰ সন্মুখীন হৈছিল ৷ বাংলাদেশৰ হাতত 5 উইকেটত পৰাস্ত হোৱাৰ বিপৰীতে 69 ৰানত পৰাস্ত হৈছিল শ্ৰীলংকাৰ বিৰুদ্ধে ভাৰত ৷
ইয়াৰ পাচতেই দেশজুৰি তীব্ৰ প্ৰতিক্ৰিয়াৰ সৃষ্টি হৈছিল ৷ বহু ঠাইত এই পৰাজয়ৰ মাজত হিংসাত্মক ঘটনা সংঘটিত হোৱাৰ লগতে খেলুৱৈ সকলৰ জীৱনলৈ আহিছিল ভাবুকি ৷ বহু ঠাইত খেলুৱৈৰ পুত্তলিকা দাহ কৰি প্ৰতিবাদ সাব্যস্ত কৰিছিল ক্ৰিকেট অনুৰাগীয়ে ৷ পৰিস্থিতি ইমানে গম্ভীৰ হৈ পৰিছিল যে, খেলুৱৈৰ সুৰক্ষা বৃদ্ধি কৰা হৈছিল ৷ ধোনীয়ে এই ক্ষেত্ৰত অনুভৱ ব্যক্ত কৰি কৈছিল যে,সেই সময়ত তেওঁ নিজকে এজন সন্ত্ৰাসবাদীৰ দৰে অনুভৱ হৈছিল বুলি মন্তব্য কৰিছিল ৷ কাৰণ বিমানবন্দৰত পুলিচৰ এখন গাড়ীত ধোনীক লৈ অনা হৈছিল স্ব-গৃহলৈ ৷
