স্পৰ্টছ ডেস্ক, 6 জুনঃ অহা 11 জুনত ভাগ্য নিৰ্ণয় হ'ব পাকিস্তানী ক্ৰিকেটাৰ উমৰ আকমলৰ । দুটাকৈ পৃথক-পৃথক ঘটনাত পিচিবিৰ দুৰ্নীতি দমন আইন উলংঘনৰ অভিযুগত 3 বছৰৰ নিষেধাজ্ঞাৰ সন্মুখীন হৈছিল খেলুৱৈগৰাকী । ইয়াৰ পাচতেই এই শাস্তিৰ বিৰুদ্ধে আবেদন দাখিল কৰিছিল খেলুৱৈগৰাকীয়ে । এই আবেদনৰেই শুনানি গ্ৰহণ কৰিব পাকিস্তানৰ উচ্চতম ন্যায়ালয়ৰ প্ৰাক্তন বিচাৰপতি (অৱসৰপ্ৰাপ্ত) ফকিৰ মুহাম্মদ খোখাৰে । অহা 11 জুনত গ্ৰহণ কৰা হ'ব শুনানি ।
ইতিমধ্যে পিচিবি আৰু উমৰ আকমললৈ জাননী প্ৰদান কৰা হৈছে বুলি এক বিবৃতি যোগে জানিবলৈ দিয়ে পাকিস্তান ক্ৰিকেট ব'ৰ্ডে ।
যোৱা 27 এপ্ৰিলত বিচাৰপতি (অৱসৰপ্ৰাপ্ত) ফেজল-ই-মিৰাণ চৌহানে খেলুৱৈগৰাকীক দোষী সাব্যস্ত কৰি তিনি বছৰৰ নিষেধাজ্ঞাৰ শাস্তি প্ৰদান কৰিছিল । 2.4.4 অনুচ্ছেদৰ অধীনত দুটাকৈ বিষয়ত পিচিবিৰ দুৰ্নীতি দমন আইন উলংঘনৰ বাবদ এই শাস্তি বিহা হৈছিল খেলুৱৈগৰাকীক । ইয়াৰ পাচত পিচিবিৰ পৰা কোনো ধৰণৰ প্ৰতিক্ৰিয়া প্ৰকাশ কৰা হোৱা নাছিল ।
কিন্তু এই শুনানিৰ বিৰুদ্ধে যোৱা 19 মে'ত এক আবেদন দাখিল কৰিছিল খেলুৱৈগৰাকীয়ে ।
