স্পৰ্টছ ডেস্ক, 13 জুনঃ ভাৰতীয় ক্ৰিকেট দলক লৈ প্ৰাক্তন ক্ৰিকেটাৰ গৌতম গম্ভীৰৰ গুৰুত্বপূৰ্ণ মন্তব্য । গম্ভীৰৰ মতে, বহু-পাৰ্শ্বীয় টুৰ্ণামেণ্টৰ নক্ আউট স্তৰত খেলাৰ সময়ত বৰ্তমানৰ ভাৰতীয় দলটোৰ মাজত বিশ্বাসৰ অভাৱ আছে । যাৰ বাবে ভাৰতীয় দলটোৱে ছেমিফাইনেল অথবা ফাইনেলত পৰাজয়ৰ সন্মুখীন হ'বলগীয়া হৈ আছে বুলি উল্লেখ কৰে গম্ভীৰে ।
ভাৰতে শেষবাৰৰ বাবে আইচিচি প্ৰতিযোগিতাত 2013 চনত ধোনীৰ নেতৃত্বত ইংলেণ্ডত চেম্পিয়নছ ট্ৰফী জয়ী হ'বলৈ সক্ষম হৈছিল । তাৰ পিছৰ পৰা এদিনীয়া বিশ্বকাপৰ ছেমিফাইনেলত অৱতীৰ্ণ হৈছিল যদিও পৰাজয়বৰণ সন্মুখীন হয় । ঠিক একেদৰে 2017 চেম্পিয়নছ ট্ৰফীটো ফাইনেলত পাকিস্তানৰ হাতত পৰাজয়বৰণ কৰিছিল ভাৰতে ।
এই ক্ষেত্ৰত গুৰুত্বপূৰ্ণ মন্তব্য প্ৰদান কৰি গম্ভীৰে কয়, মই ভাৱো আমি সম্ভৱত হেঁচা সহন কৰিব পৰা নাই । সম্ভৱত অন্যান্য দলে সেইটো সহন কৰিবলৈ সক্ষম হৈছে । তেওঁ লগতে কয়, যদি আপুনি ছেমিফাইনেল আৰু ফাইনেল মেচ সমূহ চায়, তেন্তে দলটোৱে বাস্তৱিকতে লীগ স্তৰত ভাল প্ৰদৰ্শন কৰিবলৈ সক্ষম হৈছে । কিন্তু ছেমিফাইনেল আৰু নক্ আউট মেচত ভাল প্ৰদৰ্শন কৰিব পৰা নাই । এইটোৱে দলটোৰ মানসিক দৃঢ়তাক সূচাইছে ।
গম্ভীৰে ইয়াৰ ওপৰি কয়, আমি কথা ক'ব পাৰো আমি সকলো লাভ কৰিবলৈ সক্ষম হৈছো । আমাৰ তাত বিশ্ব চেম্পিয়ন হোৱাৰ সক্ষমতা আছে । কিন্তু যেতিয়ালৈ ক্ৰিকেটৰ খেলপথাৰত অৱতীৰ্ণ নহয় বা প্ৰমাণ কৰি নেদেখুৱাই তেতিয়ালৈ আপোনাক কেতিয়াও বিশ্ব চেম্পিয়ন বুলি কোৱা নাযায় বুলি উল্লেখ কৰে ।
ভাৰতীয় দলটোৰ আইচিচি ইভেণ্ট সমূহত এটাই সমস্য়া হৈছে লীগ স্তৰৰ দলৰ গতিক নক্ আউটত নিবলৈ অসমৰ্থ হোৱা । উদাহৰণ স্বৰূপে 2019 বিশ্বকাপ বিৰাট নেতৃত্বাধীন দলটোৱে লীগ স্তৰত শীৰ্ষ স্থান দখল কৰিছিল যদিও ছেমিফাইনেলত নিউজিলেণ্ডৰ হাতত পৰাজয়ৰ সন্মুখীন হৈছিল ।
গম্ভীৰৰ মতে, দ্বিপক্ষীয় আৰু লীগ স্তৰীয় মেচত আপুনি ভুল কৰাৰ সুযোগ লাভ কৰিলেও নক্ আউট মেচত ভূল কৰা মানে ঘৰলৈ উভতনি যাত্ৰা কৰা ।
গতিকে যেতিয়াই খেলত বিশ্বাসৰ কথা আহি পৰে তেতিয়াই গুৰুত্বপূৰ্ণ খেল সমূহত ভাৰতৰ মাজত সেই অভাৱ দেখা পোৱা গৈছে বুলি কয় প্ৰাক্তন ক্ৰিকেটাৰগৰাকীয়ে ।
লগতে পঢ়কঃ অ'এনজিচিৰ অসম সম্পদে বিপদ মাতিছে শিৱসাগৰলৈ
