নেশ্যনেল ডেস্ক, ১২ মাৰ্চ: মমতা বেনাৰ্জীৰ খবৰ ল'বলৈ কলকাতাত উপস্থিত হ'ব বিচিচিআইৰ সভাপতি সৌৰভ গাংগুলী । অৱশ্যে কেতিয়া পশ্চিমবংগত উপস্থিত হ'ব সেই বিষয়ে কোনো স্পষ্ট কৰা নাই গাংগুলীয়ে । দুৰ্বৃত্তৰ আক্ৰমণত আহত হয় পশ্চিমবংগৰ মুখ্যমন্ত্ৰী মমতা বেনাৰ্জী ।
বুধবাৰে নিৰ্বাচনী প্ৰচাৰৰ উদ্দেশ্যে নন্দীগ্ৰামত উপস্থিত হোৱাৰ সময়তেই দুৰ্বৃত্তই তেওঁৰ ওপৰত আক্ৰমণ চলোৱা বুলি অভিযোগ উত্থাপন কৰিছে তৃণমূল কংগ্ৰেছৰ নেত্ৰীগৰাকীয়ে । চাৰি-পাঁচজন লোকে তেওঁক গাড়ীৰ ফালে থেলি দিয়াৰ লগতে জোৰকৈ দুৱাৰ বন্ধ কৰাৰ চেষ্টা কৰিছিল বুলি কয় মমতাই ।
উল্লেখযোগ্য যে, এই আক্ৰমণটো বুধবাৰে প্ৰায় ৬.১৫ বজাত সংঘটিত হৈছিল । বেনাৰ্জীয়ে নন্দীগ্ৰামৰ স্থানীয় মন্দিৰত আশীষ লোৱাৰ পাছত ৰেয়াপাৰাৰ সমীপৱৰ্তী বিৰুলীয়া অঞ্চলৰ পৰা উভতাৰ সময়তে চাৰি-পাঁচজন লোকে তেওঁক আক্ৰমণ কৰে । দুৰ্বৃত্তৰ আক্ৰমণত বাওঁ ভৰিত গুৰুত্বৰভাৱে আঘাতপ্ৰাপ্ত মমতা সম্প্ৰতি কলকাতাৰ এছএছকেএম চিকিৎসালয়ত চিকিৎসাধীন । সূত্ৰ অনুসৰি, তেওঁ অকল ভৰিতেই নহয়, হাত, কান্ধ আৰু ডিঙিতো আঘাতপ্ৰাপ্ত হৈছে ।
বৃহস্পতিবাৰে ৰাজ্যখনৰ ৰাজ্যপাল জগদীপ ধনকাৰে দলৰ অন্যান্য সদস্যসকলৰ সৈতে এছএছকেএম চিকিৎসালয়ত উপস্থিত হৈ স্বাস্থ্যৰ বুজ লয় । মন কৰিবলগীয়া যে, হুইল চেয়াৰত বহি আগন্তুক পশ্চিমবংগ বিধানসভা নিৰ্বাচনৰ প্ৰচাৰ অভিযান চলাব মুখ্যমন্ত্ৰীগৰাকীয়ে । চিকিৎসালয়ৰ বিচনাৰ পৰাই দলৰ সকলো কৰ্মীকে শান্তি বজাই ৰাখিবলৈ আহ্বান জনায় কয় যে, এই আঘাতে তেওঁক প্ৰচাৰ অভিযানত বাধা প্ৰদান কৰিব নোৱাৰিব ।
লগতে পঢ়ক: ‘ভেকোল ফৰ লোকেল’ দেশৰ স্বাধীনতা সংগ্ৰামী সকলৰ বাবে শ্ৰেষ্ঠ শ্ৰদ্ধাঞ্জলি: মোদী
