স্পৰ্টছ ডেস্ক, 21 জানুৱাৰীঃ বুছফায়াৰ চেৰেটি ক্ৰিকেট মেচৰ বাবে পণ্টিং একাদশ দলৰ প্ৰশিক্ষকৰ ভূমিকাত দেখা পোৱা যাব ভাৰতৰ তথা বিশ্বৰ মহানতম খেলুৱৈ শচীন তেণ্ডুলকাৰক ৷ শচীনৰ লগতে দলটোৰ বলিং প্ৰশিক্ষকৰ ভূমিকাত থাকিব ৱেষ্ট ইণ্ডিজৰ মহান খেলুৱৈ কৰ্টনী ৱাল্ছ ৷ পণ্টিঙৰ দলটোক পৰিচালনা কৰিব শ্বেন ৱাৰ্ণে ৷ বুছফায়াৰত ক্ষতিগ্ৰস্ত হোৱা লোকসকলক সহায়ৰ বাবে এই চেৰেটি মেচখনৰ আয়োজন কৰা হৈছে ৷
ক্ৰিকেট অষ্ট্ৰেলিয়াৰ মতে, এই মেচখনৰ নাম ‘‘বুছফায়াৰ ক্ৰিকেট বেছ’’ বুলি নামাকৰণ কৰা হ’ব ৷ অহা 8 ফেব্ৰুৱাৰীত অনুষ্ঠিত হ’ব এই মেচখন ৷ মেচখনত জণ্টিন লেংগাৰ, এডাম গিলখ্ৰীষ্ট, ব্ৰেট লী, শ্বেন ৱাটছন, এলেক্স ব্লেকৱেল আৰু মাইকেল ক্লাৰ্কে অংশগ্ৰহণ কৰিব ৷ ইপিনে ষ্টিভ ৱাগ আৰু মেল জনছেও খেলুৱৈ ৰূপত নহয় অন্য ৰূপত অংশ গ্ৰহণ কৰিব এই মেচখনত ৷ এই মেচখনৰ পৰা লাভ কৰা সমস্ত ধন ৰেড ক্ৰছক প্ৰদান কৰা হ’ব ৷
উল্লেখ্য যে, অষ্ট্ৰেলিয়াত সংঘটিত হোৱা ভয়ংকৰ বুছফায়াৰত 29 জন লোকৰ মৃত্যু হোৱাৰ লগতে 2000 বাসগৃহ, বহু জীৱ-জন্তুৰ ক্ষতিসাধন হৈছিল ৷ এই ঘটনাক লৈ ৱাৰ্ণ, ক্ৰিছ লিন, গ্লেন মেক্সৱেল, টেনিছ ষ্টাৰ চেৰেনা উইলিয়ামছ আৰু নিক কিৰ্গিয়োছকে ধৰি বহু খেলুৱৈয়ে ধন সংগ্ৰহ কৰিছিল ৷
