স্পৰ্টছ ডেস্ক, 3 জুনঃ 2019 বিশ্বকাপৰ ছেমিফাইনেলত ভাৰতক পৰাস্ত কৰি দলীয় সতীৰ্থৰ সৈতে ড্ৰেচিং ৰূমত সময় অতিবাহিত কৰাটো আটাইতকৈ স্মৰণীয় দিন বুলি উল্লেখ কৰিছে নিউজিলেণ্ডৰ অলৰাউণ্ডাৰ খেলুৱৈ জিমী নীছমে ।
আইপিএলৰ নিজৰ কিংছ ইলেভেন পাঞ্জাৱ দলৰ টুইটাৰ একাউণ্টত অনুৰাগীয়ে কৰা এক প্ৰশ্নৰ উত্তৰত এনেদৰে নিজৰ মনৰ অনুভৱ ব্যক্ত কৰিছে নিউজিলেণ্ডৰ ক্ৰিকেটাৰগৰাকীয়ে ।
বিগত বৰ্ষৰ বিশ্বকাপত ভাৰত আৰু নিউজিলেণ্ডৰ বিৰুদ্ধে অনুষ্ঠিত হোৱা প্ৰথমখন ছেমিফাইনেলত নিউজিলেণ্ডৰ হাতত পৰাজয়বৰণ কৰি ফাইনেলৰ পৰা বাহিৰ হ'বলগীয়া হৈছিল বিৰাট নেতৃত্বাধীন ভাৰতীয় ক্ৰিকেট দলটো । বৰষুণৰ বাবে দ্বিতীয় দিনলৈ স্থানান্তৰিত হৈছিল ভাৰত-নিউজিলেণ্ডৰ মাজৰ ছেমিফাইনেল মেচখন ।
মেচখনত ভাৰতে নিউজিলেণ্ডক আঠ উইকেটৰ বিনিময়ত 239 ৰানত বান্ধি ৰাখিবলৈ সক্ষম হৈছিল যদিও মেচখনত ভাৰতে কেৱল 221 ৰান হে সংগ্ৰহ কৰিবলৈ সক্ষম হৈছিল । ফলত ছেমিফাইনেলতেই নিজৰ বিশ্বকাপৰ যাত্ৰা সামৰিব লগা হৈছিল ভাৰতীয় দলটোৱে । ভাৰতে মেচখনত 92 ৰানতেই নিজৰ গুৰুত্বপূৰ্ণ ছয়টা উইকেট হেৰুৱাই দিছিল । ইয়াৰ পাচত ৰবীন্দ্ৰ জাডেজাই 59 বলত 77 ৰ ইনিংছ খেলি ভাৰতক জয়ৰ আশা জীয়াই ৰখাত গুৰুত্বপূৰ্ণ ভূমিকা পালন কৰিছিল । ধোনীৰ সৈতে জডেজাই 116 ৰানৰ সহযোগিতা কৰিছিল । মেচখনৰ 49 অভাৰত ধোনীৰ ৰান আউটৰ লগে-লগেই ভাৰতৰ জয় আশা সমাপ্ত হৈছিল ।
ফাইনেলত ইংলেণ্ডৰ বিৰুদ্ধে মুখামুখি হৈছিল নিউজিলেণ্ড । য'ত ছুপাৰ অভাৰত বাউণ্ডেৰী নিয়মৰ অধীনত পৰাজয়বৰণ কৰিবলগীয়া হৈছিল নিউজিলেণ্ড দলটো । ইংলেণ্ডে পোন প্ৰথমবাৰৰ বাবে এদিনীয়া বিশ্ব চেম্পিয়নৰ খিতাপ অৰ্জন কৰিছিল ।
লগতে চাওকঃ কোভিড-১৯ আক্ৰান্ত ৰোগীৰ সংস্পৰ্শলৈ অহা স্বাস্থ্য কৰ্মীক লৈ চিন্তাৰ কাৰণ
