স্পৰ্টছ ডেস্ক, 11 মাৰ্চ: ইণ্ডিয়া লিজেণ্ডৰ হাতত পৰাস্ত শ্ৰীলংকা লিজেণ্ড ৷ পথ সুৰক্ষা বৃদ্ধি কৰাৰ বাবে আয়োজন কৰা টুৰ্ণামেণ্টত একেৰাহে দ্বিতীয়টো জয় লাভ ইণ্ডিয়া লিজেণ্ডৰ ৷ শ্ৰীলংকা লিজেণ্ডৰ বিৰুদ্ধে 5 উইকেট জয় লাভ ইণ্ডিয়া লিজেণ্ডৰ ৷ ইৰফান পাঠানৰ অপৰাজিত 57 ৰানৰ বিনিময়তে 18.4 অভাৰত 139 ৰান লক্ষ্য অতিক্ৰম কৰিবলৈ সক্ষম হয় ইণ্ডিয়া লিজেণ্ডে ৷
মেচখনত ইণ্ডিয়া লিজেণ্ডে টছত জয় লাভ কৰি প্ৰথমে বলিং কৰাৰ সিদ্ধান্ত গ্ৰহণ কৰে ৷ প্ৰথমে বেটিং কৰিবলৈ আহি শ্ৰীলংকা লিজেণ্ড দলটোৱে নিৰ্ধাৰিত 20 অভাৰত 8 টা উইকেট হেৰুৱাই 138 ৰান সংগ্ৰহ কৰিবলৈ সক্ষম হয় ৷ তিলকৰত্ন দিলচান আৰু ৰমেশ কালুবিতাৰণাই দলটোক সুন্দৰ আৰম্ভণি দিবলৈ সক্ষম হয় ৷ প্ৰথম উইকেটৰ বাবে দুয়োয়ে 46 ৰানৰ সহযোগিতা আগবঢ়ায় ৷ দিলচান 23 ৰান কৰাৰ বিপৰীতে কালুবিতাৰণাই 21 ৰান কৰে ৷
এই লক্ষ্য অতিক্ৰম কৰিবলৈ আহি ভাৰতীয় দলটো বিপৰ্যয়ৰ সন্মুখীন হয় আৰু দলটোৱে কেৱল 19 ৰানত 3 টা উইকেট হেৰুৱায় ৷ ছেহৱাগ 3 ৰান কৰাৰ বিপৰীতে শচীন তেণ্ডুলকাৰ শূণ্য আৰু যুৱৰাজ সিং 1 ৰান কৰি পেভিলিয়নলৈ উভতে ৷ পিছত মহম্মদ কেঈফ আৰু ইৰফান পাঠানে ভাৰত জয় সুনিশ্চিত কৰে ৷ পাঠানে অপৰাজিত 37 বলত 57 ৰান কৰাৰ বিপৰীতে কেঈফে 46 ৰান কৰে ৷
উল্লেখ্য যে, ভাৰতত ক্ৰমান্বয়ে বৃদ্ধি পোৱা পথ দুৰ্ঘটনাৰ সংখ্যাৰ প্ৰতি লক্ষ্য ৰাখিয়ে জনসাধাৰণৰ মাজত পথ সুৰক্ষা বৃদ্ধি কৰাৰ বাবেই আয়োজন কৰা হৈছে এই ‘Road Safety World Series 2020’ ক্ৰিকেট প্ৰতিযোগিতা ৷ য’ত বহু নামি-দামী ক্ৰিকেট তাৰকাই অংশগ্ৰহণ কৰিছে ৷ ইয়াৰ ভিতৰতে আছে শচীন তেণ্ডুলকাৰ, বীৰেন্দ্ৰ সেহৱাগ, যুৱৰাজ সিং, জাহিৰ খান, ব্ৰায়ন লাৰা, শিৱনাৰায়ন চন্দ্ৰপলকে ধৰি অষ্ট্ৰলিয়া, শ্ৰীলংকা, দক্ষিণ আফ্ৰিকাৰ বহু প্ৰাক্তন তাৰকা ক্ৰিকেটাৰ ৷
লগতে চাওক- অলিম্পিক কোৱালিফায়াৰ্ছ: ছেমিফাইনেলত থমকিল লাভলীনা, পংঘাল
