স্পৰ্টছ ডেস্ক, 11 আগষ্টঃ ত্ৰিণিডাড কুইন্স পাৰ্ক অ'ভেলত অনুষ্ঠিত হৈছে ভাৰত আৰু ৱেষ্ট ইণ্ডিজৰ মাজত দ্বিতীয়খন আন্তঃৰাষ্ট্ৰীয় এদিনীয়া মেচ ৷ টছত জয়ী প্ৰথমে বেটিং কৰি নিৰ্ধাৰিত 50 অভাৰত 7 উইকেট হেৰুৱাই 279 ৰান সংগ্ৰহ কৰিবলৈ সক্ষম হয় ভাৰতে ৷ ভাৰতৰ হৈ বিৰাট কোহলিয়ে অৰ্জন কৰে আন্তঃৰাষ্ট্ৰীয় এদিনীয়া ক্ৰিকেটৰ 42 তম শতক ৷ এই মেচখনতেই বহু নতুন কৃতিত্ব গঢ়িবলৈ সক্ষম হৈছে বিৰাট কোহলিয়ে ৷ 19 ৰান সংগ্ৰহেৰে ৱেষ্ট ইণ্ডিজৰ বিৰুদ্ধে সৰ্বাধিক ৰান সংগ্ৰহ কৰা জাৱেদ মিয়াদাদৰ অভিলেখ ভংগ কৰাৰ লগতে আন্তঃৰাষ্ট্ৰীয় এদিনীয়া ক্ৰিকেটত সৰ্বাধিক ৰান কৰা দ্বিতীয়গৰাকী ভাৰতীয় খেলুৱৈৰ অভিলেখ ৰচে বিৰাট কোহলিয়ে ৷ সৌৰভ গাংগুলীৰ অভিলেখ ভংগ কৰি এই কৃতিত্ব লাভ কৰে বিৰাটে ৷
ইপিনে মেচখনত শিখৰ ধাৱনে 2, ৰোহিত শৰ্মাই 18, ঋষভ পন্তে 20, শ্ৰেয়াছ আয়াৰে 71, কেদাৰ যাদৱে 16, ভূৱনেশ্বৰ কুমাৰে 1, ৰবিন্দ্ৰ জাডেজাই অপৰাজিত 16, মহম্মদ শ্বামীয়ে অপৰাজিত 3 ৰানৰ বৰঙণি আগবঢ়ায় ৷ এতিয়া ৱেষ্ট ইণ্ডিজক নিৰ্ধাৰিত 50 অভাৰত জয়ৰ বাবে প্ৰয়োজন 280 ৰানৰ ৷ ৱেষ্ট ইণ্ডিজৰ হৈ ক্ৰীছ গেইলৰ আন্তঃৰাষ্ট্ৰীয় এদিনীয়া ক্ৰিকেট এইটো হৈছে 300 সংখ্যক এদিনীয়া মেচ ৷ ৱেষ্ট ইণ্ডিজ দলৰ হৈ 300 খন এদিনীয়া মেচত অংশগ্ৰহণ কৰা প্ৰথমজন খেলুৱৈ হৈছে ক্ৰীছ গেইল ৷ ভাৰতে তিনিখন আন্তঃৰাষ্ট্ৰীয় এদিনীয়া শৃংখলাত মুখামুখি হ’ব ৱেষ্ট ইণ্ডিজৰ ৷ প্ৰথমখন এদিনীয়া বৰষুণৰ বাবে বাতিল কৰা হৈছিল ৷
