স্পৰ্টছ ডেস্ক, ১২ মে': ২০০৮ বৰ্ষৰ ভাৰতীয় দলৰ নিৰ্বাচনক লৈ হোৱা এক বিতৰ্কৰ কথা শেহতীয়াকৈ ৰোমন্থন কৰি প্ৰাক্তন ক্ৰিকেটাৰ আৰ পি সিঙে কয়, ধোনীয়ে কেতিয়াও ক্ৰিকেট আৰু সিদ্ধান্ত গ্ৰহণৰ ক্ষেত্ৰত পক্ষপাতিত্ব কৰা নাছিল । YouTube চেনেলত এই কথা উল্লেখ কৰে আৰ পি সিঙে । উল্লেখ্য যে, ইৰফান পাঠানৰ বাবে আৰ.পি সিঙক সেই সময়ত দলৰ পৰা বাহিৰ কৰি দিয়া হৈছিল ।
জানিব পৰা মতে, ইংলেণ্ডৰ বিৰুদ্ধে গৃহভূমিত অনুষ্ঠিত হোৱা এদিনীয়া শৃংখলাখনত ইৰফান পাঠানৰ স্থানত আৰ.পি.সিঙক দলত বিচাৰিছিল অধিনায়ক ধোনীয়ে । যাৰ বাবে নিৰ্বাচক মণ্ডলীৰ সৈতে মতানৈক্যত লিপ্ত হৈছিল ধোনী ।
সেই বিষয়টো সুঁৱৰি আৰ পি সিঙে কয়, ইংলেণ্ডৰ সেই শৃংখলাই মোক প্ৰভাৱিত কৰিছিল বুলি মই নাভাৱো । মই ইন্দোৰত উইকেট লাভ কৰিবলৈ সক্ষম হোৱা নাছিলো । সকলো খেলুৱৈয়ে দুই-তিনিটা সুযোগ লাভ কৰাৰ কথা চিন্তা কৰে । ইয়াৰ অৰ্থ এইটো নহয় যে, কিছুমানে ৫ টা আৰু কিছুমান সৌভাগ্য়ৱানে ১০ টা সুযোগ লাভ কৰিব । কিন্তু বহু বাৰ মোৰ ক্ষেত্ৰত এনেকৈ ঘটিছিল । যেতিয়াই মোৰ প্ৰদৰ্শন অলপ পৰিমাণে বেয়ালৈ গতি কৰিছিল তেতিয়াই মোক পোনে-পোনে ঘৰুৱা ক্ৰিকেট খেলিবলৈ পঠিয়াই দিয়া হৈছিল । কিন্তু কেতিয়াবা বহু খেলুৱৈৰ ক্ষেত্ৰত বেয়া প্ৰদৰ্শন কৰাৰ পাচতো দলত বৰ্তি থাকি ভাল অনুশীলনৰ সুযোগ লাভ কৰিবলৈ পোৱা দেখা যায় । যিটো সময়ত আপুনি ঘৰুৱা ক্ৰিকেট খেলিবলৈ গৈছে, সেই সময়ত আপুনি মানদণ্ড প্ৰতিদ্বন্দিতাৰ পৰা বঞ্চিত হৈছে ।
আৰ পি সিঙে ইয়াৰ ওপৰি কয়, ধোনীৰ সৈতে মই প্ৰায়ে আলোচনা কৰিছিলো । ক'ত মই নিজকে শুধৰাবলৈ প্ৰয়োজন, কি কৰিব লাগিব অধিক ভাল কৰিবলৈ । মই জানো ধোনীৰ বন্ধুত্ব এটা বেলগ দিশ আৰু দেশক নেতৃত্ব বহন কৰাটো অন্য় ।
সেই মুহূৰ্তত মই ভাৱো ধোনীয়ে যি সকলক দলৰ বাবে ভাল বুলি ভাবিছিল তেওঁলোক সমৰ্থন দিছিল । যিয়ে পৰিকল্পনা সমূহ সঠিক ভাৱে ৰূপায়ন কৰিব বুলি ভাবিছিল তেওঁলোকক ধোনীয়ে সমৰ্থন তথা আগবঢ়াই নিয়াৰ চেষ্টা কৰিছিল বুলি কয় আৰ পি সিঙে । সেই বাবেই এম.এছ ধোনী আজিৰ এম.এছ ধোনী । ক্ৰিকেটৰ সিদ্ধান্ত লোৱাৰ ক্ষেত্ৰত সদায় নিৰপেক্ষ মতামত আছিল ধোনীৰ ।
প্ৰাক্তন দ্ৰুতবলাৰ গৰাকীয়ে আকৌ কয়, মই সিমান খেলিবলৈ সক্ষম নহ'লো যিমান হ'ব লাগিছিল । হয়তো মোৰ গতি হ্ৰাস পালে অথবা ছুইং হেৰুৱাই পেলালো মই । বাকী সকলোবোৰ গৌণ । যদি মই নিজকে উন্নত কৰিবলৈ সক্ষম হ'লো হয়, তেন্তে মই অধিক মেচ খেলিবলৈ সক্ষম হ'লো হয় । কিন্তু যিমান খিনি মই পালো তাতেই সন্তুষ্ট বুলি কয় আৰ.পি.সিঙে । ভাৰতৰ হৈ ১৪ খন টেষ্ট, ৫৮ খন এদিনীয়া আৰু ১০ খন টি-২০ মেচত প্ৰতিনিধিত্ব কৰিছিল আৰ.পি.সিঙে ।
