স্পৰ্টছ ডেস্ক, 11 মাৰ্চ : কৰ'ণাভাইৰাছে আতংকময় পৰিস্থিতিৰ সৃষ্টি কৰা বাবে ভাৰত বনাম দক্ষিণ আফ্ৰিকা মেচত দৰ্শকৰ ভিৰ পৰিলক্ষিত নহ'ব ৷ ভাৰতত বৰ্তমানলৈকে 61 জন লোক কৰ'ণাভাইৰাছত আক্ৰান্ত হোৱাৰ ফলত হিমাচল প্ৰদেশ ক্ৰিকেট ষ্টেডিয়াম শূন্য হৈ থকাৰ সম্ভাৱনা আছে ৷ উল্লেখ্য যে, বৃহস্পতিবাৰে ভাৰত-দক্ষিণ আফ্ৰিকাৰ মাজত প্ৰথমখন এদিনীয়া মেচ অনুষ্ঠিত হ'ব ৷
22,000 আসনযুক্ত ষ্টেডিয়ামখনৰ প্ৰায় 40 শতাংশ আসন বুধবাৰলৈকে বিক্ৰী নোহোৱাকৈ থাকি যায় ৷
এই সম্পৰ্কত ষ্টেডিয়াম কৰ্তৃপক্ষই জানিবলৈ দিয়া অনুসৰি, কৰ'ণাভাইৰাছ আতংকৰ পৰিপেক্ষিতত জনসমাগৰ পৰা আঁতৰত থাকিবৰ বাবে এনেদৰে দৰ্শকে টিকেট ক্ৰয় কৰা নাই ৷
লেগ স্পীনাৰ য়ুজবেন্দ্ৰ ছাহালে মঙলবাৰে হিমাচল প্ৰদেশলৈ উৰা মৰাৰ পূৰ্বে মাস্ক পৰিধান কৰি এখন ফ'টো পোষ্ট কৰিছিল ৷
ইয়াৰোপৰি, মেচত বৰষুণৰ আগজাননী লাভ কৰা বাবেও বহুসংখ্যক দৰ্শকে মেচ উপভোগ নকৰাৰ সিদ্ধান্ত গ্ৰহণ কৰিছে ৷ আনহাতে, মেচখন বন্ধৰ দিনত অনুষ্ঠিত নোহোৱাৰ বাবেও বহুতে উপভোগ নকৰে বুলি আয়োজকে জানিবলৈ দিয়ে ৷
উল্লেখ্য যে, ইয়াৰ পূৰ্বে 2019 চনৰ ছেপ্তেম্বৰত এই ষ্টেডিয়ামতে দক্ষিণ আফ্ৰিকা আৰু ভাৰতৰ মাজৰ মেচখনো বৰষুণৰ বাবে বাতিল হৈছিল ৷
আৰু পঢ়ক : অসমৰ প্ৰশংসাত পঞ্চমুখ কেভিন পিটাৰছেন
