স্পৰ্টছ ডেস্ক, 1 জুন: সোমবাৰে মুম্বাইত কৰ'ণা ভাইৰাছৰ শেহতীয়া পৰিস্থিতি,টকিঅ' অলিম্পিক বিভিন্ন বিষয়কলৈ ভাৰতীয় শ্বাটলাৰ চিৰাগ ছেট্টীৰ সৈতে ইটিভি ভাৰতৰ এক বিশেষ সাক্ষাৎকাৰ । এই সাক্ষাৎকাৰতেই ডাব্লুছ বেডমিণ্টন খেলুৱৈগৰাকীয়ে সতীৰ্থ খেলুৱৈ সাতৱাইকাইৰাজ ৰানকিৰেড্ডীৰ বিষয়েও কিছু কথা অৱগত কৰে ।
বৰ্তমান সময়ত লক্ ডাউনৰ ফলতেই মুম্বাইত আৱদ্ধ হৈ থাকিবলগীয়া হৈছে ভাৰতৰ ডাব্লুছ বেডমিণ্টন খেলুৱৈগৰাকী । লক্ ডাউনৰ ফলত অনুশীলনত অসুবিধাৰ সন্মুখীন হৈছে যদিও খেলুৱৈগৰাকীয়ে বৰ্তমান সময়ত পুৱা আৰু সন্ধিয়া এঘণ্টাকৈ অনুশীলন কৰা বুলি অৱগত কৰে । এই অনুশীলনৰ মাজত থাকে যোগ আৰু শ্বাস-প্ৰশ্বাসৰ কিছু অনুশীলন । সন্ধিয়া ৪ বজাৰ পৰা ৫ বজালৈ পুৱা ভাগত কৰা অনুশীলনৰেই পুনৰাবৃত্তি কৰা বুলি অৱগত কৰে চিৰাগ ছেট্টীয়ে ।
অৱশ্যে জিম যোৱাতকৈ ঘৰতে অনুশীলন কৰাৰ বাবে বহু কেইটা সমস্যাৰ সন্মুখীন হ'বলগীয়া হৈছে বুলিও উল্লেখ কৰে খেলুৱৈগৰাকীয়ে ।খেলুৱৈগৰাকীয়ে কয়, ঘৰতে অনুশীলন কৰাটো কঠিন হয় । মই বাহিৰলৈ ঘুৰি ফূৰা কৰা এজন লোক । বিভিন্ন প্ৰতিযোগিতাৰ বাবে বিভিন্ন ঠাইলৈ ভ্ৰমণ কৰি থাকিবলগীয়া হয় । বৰ্তমানে প্ৰায় দুমাহ ধৰি কৰ'ণা ভাইৰাছৰ লক্ ডাউনৰ ফলত আবদ্ধ হৈ থাকিবলগীয়াটো যথেষ্ট কষ্টকৰ বুলি উল্লেখ কৰি অতিশীঘ্ৰেই সকলো পৰিস্থিতি স্বাভাৱিক অৱস্থালৈ পৰিণত হয় তাৰে আশা প্ৰকাশ কৰিছে খেলুৱৈগৰাকীয়ে ।
আনহাতে ঘৰত অধিক বেডমিণ্টন খেলিবলৈ নোৱাৰাৰো কথা উল্লেখ কৰে চিৰাগে । প্ৰথমে চাদত বহু খেলিছিল যদিও ঘৰত এক উচিত বেডমিণ্টন মেচ খেলা সম্ভৱ নহয় বুলি কয় শ্বাটলাৰগৰাকীয়ে ।
আনহাতে নিজৰ সংগী খেলুৱৈ ৰানকিৰেড্ডীৰ বিষয়ে চিৰাগে কয়, আমি দুয়ো একোজন ভাল বন্ধু । মোৰ বোধৰে কৰ্টত অধিক বুজিবলৈ কৰ্টৰ বাহিৰতো বন্ধুত্ব গঢ়ি উঠাটো জৰুৰী । ফোন আৰু হোৱাটছএপ্ ত প্ৰায়ে আমাৰ মাজত কথা-বাৰ্তা হৈ থকা বুলি প্ৰকাশ কৰে খেলুৱৈগৰাকীয়ে ।
ইপিনে টকিঅ' অলিম্পিক স্থগিত হোৱা খবৰত অতিকৈ মৰ্মাহত হোৱা বুলি মন্তব্য প্ৰকাশ কৰি অলিম্পিকলৈ যোগ্যতা অৰ্জনৰ বাবে আশাবাদী বুলি কয় ভাৰতীয় শ্বাটলাৰ চিৰাগ ছেট্টীয়ে ।
