ডিব্ৰুগড়,24 জানুৱাৰীঃ এইবাৰ নাগৰিকত্ব সংশোধনী আইনৰ বিৰুদ্ধে জুবিন গাৰ্গৰ এক অভিনৱ প্ৰতিবাদ । এই প্ৰতিবাদ আৰম্ভ হ'ব মুখ্যমন্ত্ৰীৰ গৃহ জিলাৰ পৰাই ৷ কিন্তু শ্লোগানেৰে নহয়, ক্ষোভেৰেও নহয়, ফুটবল খেলি 'কা'ৰ বিৰোধিতা কৰিব জুবিন গাৰ্গে । ডিব্ৰুগড়ৰ চৌকিদিঙ্গি খেলপথাৰত এই ফুটবল মেছ অনুষ্ঠিত হ'ব আগন্তুক 27 জানুৱাৰীত । কলাগুৰু আৰ্টিষ্ট ফাউণ্ডেশ্যনৰ হৈ জুবিন গাৰ্গ আৰু সতীৰ্থৰ টীমটোৱে ডিব্ৰুগড়ৰ চৌকিদিঙ্গি খেলপথাৰত নামিব 'কা'ৰ বিৰুদ্ধে ৷
ইফালে আন্দোলনৰ ধাৰা অব্যাহত ৰাখি 28 জানুৱাৰীত ডিগবৈতো কাৰ বিৰুদ্ধে প্ৰতিবাদ গঢ়ি তুলি টীমটোৱে আনখন ফুটবল মেছত অংশগ্ৰহণ কৰিব । ডিব্ৰুগড়ত ৱেক আপ গাইজ ফুটবল ক্লাৱ( Wake up guys FC) দলৰ সৈতে 27 জানুৱাৰী দিনা দিনৰ 1:30 বজাত প্ৰতিদ্বন্দিতাত নামিব জুবিনৰ দলটোৱে ৷ জুবিনৰ সৈতে গায়ক নীল আকাশ,বাবু বৰুৱা,সংগীত পৰিচালক অজয় ফুকন, গীতিকাৰ শশাংক সমীৰ,গায়ক নেকিবে ফুটবল খেলখনত অংশ ল'ব বুলি জানিব পৰা গৈছে । কলাগুৰু আৰ্টিষ্ট ফাউণ্ডেশ্যনৰ সাহাৰ্যাথে তথা কাৰ বিৰোধিতাৰে আয়োজন কৰা এই প্ৰীতি ফুটবল খেললৈ ৰাইজক নিমন্ত্ৰণ জনাইছে জুবিন গাৰ্গে ৷
