মাজুলী,31 অক্টোবৰঃ ৰাস উদযাপনৰ বাবে সাজু হৈ উঠিছে মাজুলী সত্ৰ আৰু ৰংঘৰ । বৃন্দাবন গীতৰ তালে তালে কৰিছে নৃত্যৰ আখৰা । শিশু কৃষ্ণৰ জন্ম লীলাৰ লগতে পূৰ্ণ পৰ্যায়ত চলি আছে সম্পূৰ্ণ মহাৰাসৰ আখৰা । সাজু কৰি তোলা হৈছে নতুন চামগুৰি সত্ৰৰ মুখা শিল্প ৷ ৰাসৰ মঞ্চত চমক দিবলৈ প্ৰস্তুতি চলাই আছে নতুন চামগুৰি সত্ৰই ।
বাৰিষা বানে জুৰুলা কৰা পাছত এই শৰৎ কালৰ সময়খিনিত সকলো দুখ বেদনা একাষৰীয়া কৰি মাজুলীৰ মূল উৎসৱভাগ পালনৰ বাবে সকলো উঠি পৰি লাগিছে ৰাইজ । বান - গৰাখহনীয়াই জুৰুলা কৰা শালমৰাৰ উজনি চুপহা কৃষ্টি কেন্দ্ৰত শ্ৰীশ্ৰী কৃষ্ণৰ ৰাসলীলাই এই বছৰ ৰূপালী জয়ন্তী বৰ্ষ উদযাপনৰ বাবে ব্যাপক প্ৰস্তুতি চলাইছে । গাঁৱৰ সকলোৱো অনুষ্ঠানটি সাফল্যমণ্ডিত কৰি তুলিবলৈ অহোপুৰুষাৰ্থ কৰিছে । শালমৰা উজনি চুপহাৰ মুকলি ৰাসত মাজুলীৰ বিধায়ক তথা অসমৰ মূখ্যমন্ত্ৰী সৰ্বানন্দ সোণোৱাল উপস্থিত থাকিব বুলি জনাইছে ৰাস উদযাপন সমিতিয়ে ।
