তেজপুৰ,৩১আগষ্ট: "বিশ্বনাথত বন্ধ হৈ থকা ছবি গৃহটো অহা ৬ ছেপ্টেম্বৰত "কাঞ্চনজঙ্ঘা" ছবিখনৰ জৰিয়তে পুনৰ মুকলি হ'ব ।"- শনিবাৰে কাঞ্চনজঙ্ঘা ছবিখনৰ প্ৰচাৰ চলাবলৈ গৈ তেজপুৰত এই ঘোষণা যুৱপ্ৰজন্মৰ হাৰ্টথ্ৰৱ জুবিনৰ ৷ লগতে তেজপুৰৰ বিষয়ে উল্লেখ কৰি জুবিনে ক'লে - "তেজপুৰ মোৰ আটাইতকৈ প্ৰিয় ঠাই । প্ৰিয় ঠাইখনৰ পটভূমিত নিৰ্মাণ হৈছে কাঞ্চনজঙ্ঘা ।"
আনহাতে ব্ৰাহ্মণ সমাজৰ সৈতে ছবিখনৰ এটা দৃশ্যক লৈ জুবিনৰ যি মত-পাৰ্থক্য হৈছিল সেয়া এতিয়া নাই বুলি উল্লেখ কৰে জুবিনে ৷ আনহাতে সাংবাদিকে এন আৰ চি সম্পৰ্কে সোধা প্ৰশ্নৰ উত্তৰত জুবিনে তেওঁ ৰাজনৈতিক নেতা নহয় বুলি মন্তব্য কৰি অসমৰ ৰাইজৰ লগত সদায় থকাৰ কথা উল্লেখ কৰে ।
ইপিনে বিষ্ণুপ্ৰসাদ ৰাভাৰ লগতে বক্সিঙৰ ওপৰত এখন ছবি নিৰ্মাণৰ পৰিকল্পনাৰ কথাও কলে জুবিনে । শনিবাৰে তেজপুৰ মহাবিদ্যালয়, দৰং মহাবিদ্যালয় আৰু কলেজিয়েট হাইস্কুল খেল পথাৰত জুবিনে প্ৰচাৰ চলাই ।
