চিটাৰা ডেস্ক,8 ডিচেম্বৰঃ তেলেংগানা ৰাষ্ট্ৰ সমিতিৰ সাংসদ সন্তোষ কুমাৰৰ সেউজ ভাৰত প্ৰত্যাহ্বান পদক্ষেপৰ প্ৰতি সমৰ্থন জনাই তেলেংগানাত উপস্থিত অভিনেতা সঞ্জয় দত্ত ৷ সোমবাৰে সাংসদগৰাকীৰ জন্মদিন উপলক্ষে হায়দৰাবাদৰ শিল্পৰামমত গছপুলি ৰোপন কৰে অভিনেতাগৰাকীয়ে ৷ সন্তোষ কুমাৰৰ এই পদক্ষেপত প্ৰতি সমৰ্থন জনাই সঞ্জয় দত্তই সেউজীয়াৰ প্ৰতি সজাগতা বৃদ্ধি কৰে ৷
মুন্নাভাই এম.বি.বি.এচ অভিনেতা গৰাকীয়ে এই অনুষ্ঠানৰ অংশ হ’ব পাই আনন্দিত বুলি মন্তব্য কৰাৰ লগতে স্বাস্থ্যবান আৰু স্থায়ী পৰিৱেশৰ বাবে ৰাইজক গছপুলি ৰোপনৰ বাবে আহ্বান জনায় ৷ আনহাতে, সঞ্জয় দত্তৰ উপস্থিতি তেখেতৰ জন্মদিনৰ অন্যতম উপহাৰ বুলি মন্তব্য কৰে সাংসদ সন্তোষ কুমাৰে ৷ তেখেতে সঞ্জয় দত্তক সেউজ ভাৰত প্ৰত্যাহ্বান পদক্ষেপৰ প্ৰতি সমৰ্থন জনাই এই গছৰোপন কাৰ্যসূচীত অংশগ্ৰহণ কৰাৰ বাবে ধন্যবাদ জ্ঞাপন কৰে ৷
ইয়াৰ উপৰিও সাংসদ গৰাকীৰ জন্মদিন উপলক্ষে তেলেংগানাৰ মুখ্যমন্ত্ৰী কে চন্দ্ৰশেখৰ ৰাৱে সেউজ ভাৰত প্ৰত্যাহ্বানৰ দ্বাৰা প্ৰকাশিত ‘বিকাশ বেদম’ নামৰ গ্ৰন্থখন মুকলি কৰে ৷ এই গ্ৰন্থখন লিখি উলিয়াইছে মমিদি হৰিকৃষ্ণই আৰু সম্পাদনা কৰিছে দেশপথি শ্ৰীনিবাসে ৷ এই গ্ৰন্থখন সংকলনৰ বাবে মুখ্যমন্ত্ৰী কে চন্দ্ৰশেখৰ ৰাৱে সন্তোষ কুমাৰক শুভেচ্ছা জ্ঞাপন কৰে ৷
উল্লেখ্য যে, সাংসদ সন্তোষ কুমাৰে তাৰকা, ব্যৱসায়ী আৰু বিভিন্ন প্ৰতিষ্ঠিত ব্যক্তিক সেউজ ভাৰত পদক্ষেপৰ অংশ হিচাপে গছপুলি ৰোপনৰ বাবে অহ্বান জনাই আহিছে ৷ তেখেতৰ অনুৰোধ মৰ্মেই চলিত বৰ্ষৰ ছেপ্তেম্বৰত জনপ্ৰিয় অভিনেতা প্ৰভাসে হায়দৰাবাদৰ কাষৰীয়া 1,650 একৰ ৰিজৰ্ভ ফৰেষ্ট তুলি লয় ৷ বাহুবলী অভিনেতাগৰাকীয়ে খাজীপল্লী ৰিজাৰ্ভ ফৰেষ্টৰ উন্নয়নৰ বাবে প্ৰায় 2 কোটি টকা চেক বন বিষয়াক প্ৰদান কৰে ৷
লগতে পঢ়ক-পংকজ ত্ৰিপাঠীয়ে ৰাজহুৱা কৰিলে "শ্বাকিলা"ৰ প্ৰথম পোষ্টাৰ
