নিউজ ডেস্ক, ২৫ মে': দেশত কৰ'ণা ভাইৰাছৰ বিৰুদ্ধে সন্মুখৰ পৰা যুঁজ দিয়া যোদ্ধাসকলৰ সন্মানত শেহতীয়াকৈ মুকলি কৰা হয় এক ভিডিঅ' । চিনেমা আৰু ক্ৰীড়াজগতৰ বহুকেইগৰাকী তাৰকা একত্ৰিত হৈ সন্মান প্ৰদৰ্শন কৰা দেখা পোৱা গৈছে ভিডিঅ'টো । য'ত আছে বলীউডৰ অভিনেতা অক্ষয় কুমাৰ, ক্ৰিকেটাৰ বিৰাট কোহলি, তুৰ্কীছ জাৰ্মান অভিনেতা মেৰয়েম উজেৰলি ।
ইয়াৰ লগতে এক মিনিটৰ এই ভিডিঅ'টোত দেখা পোৱা গৈছে বলীউডৰ জনপ্ৰিয় ছবি নিৰ্মাতা কৰণ জহৰ, পোছাক ডিজাইনাৰ মনিষ মালহোত্ৰা, সংগীত পৰিচালক বিশাল শেখৰ, গায়ক হৰিহৰণ, ভাৰতীয় ফুটবল দলৰ অধিনায়ক সুনীল চেত্ৰী আৰু প্ৰাক্তন ফৰ্মুলা ৱান ৱৰ্ল্ডৰ চেম্পিয়ন ডামন হিলক । কৰণ জহৰে নিজৰ ইনষ্টাগ্ৰাম একাউণ্টত মুকলি কৰিছে এই ভিডিঅ'টো ।
এই ভিডিঅ'টোত সকলোৱে কৰ'ণা ভাইৰাছৰ বিৰুদ্ধে একেলগে যুঁজ দিয়াৰ কথা উল্লেখ কৰাৰ লগতে সন্মুখৰ পৰা যুঁজ দিয়া সকলো স্বাস্থ্যকৰ্মী, চিকিৎসক, নাৰ্ছ, আৰক্ষী, চাফাই কৰ্মীসকললৈ সন্মান প্ৰদৰ্শন কৰে । লগতে এই বলিদানেৰে মানৱীয়তা জীয়াই ৰখাৰ লগতে সেইসকল লোকক প্ৰকৃত হিৰ' বুলি অভিহত কৰি ধন্যবাদ জ্ঞাপন কৰে ।
