দুৰ্গ,7 ডিচেম্বৰঃ ছত্তিশগড়ত দুৰ্গ জিলাৰ এটা বিবাহ অনুষ্ঠানত নৃত্য প্ৰদৰ্শনৰ বাবে মুম্বাইৰ পৰা আমন্ত্ৰণ কৰি অনা এগৰাকী নৃত্যশিল্পীৰ লগত দলবদ্ধ ধৰ্ষণৰ ঘটনা সংঘটিত হয় ৷ প্ৰাপ্ত বাতৰি অনুসৰি, উক্ত দলবদ্ধ ধৰ্ষণৰ ঘটনাটো 4 ডিচেম্বৰৰ নিশা আহিৱাৰা পথৰ নিকটৱৰ্তী কুমহাৰী চহৰত সংঘটিত হয় ৷
ধৰ্ষণকাণ্ডত জড়িত থকাৰ অভিযোগত কমলেশ আৰু ৰাজৰ বিৰুদ্ধে গোচৰ ৰুজু কৰা হৈছে ৷ ইফালে চনু কুমাৰ নামৰ লোকজনৰ বিৰুদ্ধে ধৰ্ষণকাণ্ডৰ ষড়যন্ত্ৰ ৰচনা কৰাৰ অভিযোগত গোচৰ ৰুজু কৰা হৈছে বুলি স্থানীয় আৰক্ষীয়ে জানিবলৈ দিয়ে ৷
কমলেশ আৰু ৰাজ নামৰ অভিযুক্ত দুটাক বৃহস্পতিবাৰে আৰক্ষীয়ে আটক কৰে ৷
ধৰ্ষিতা মহিলাগৰাকীৰ অভিযোগ অনুসৰি, কুমাৰ নামৰ লোকজনৰ আমন্ত্ৰণমৰ্মে এক বিবাহ অভ্যৰ্থনা অনুষ্ঠানত নৃত্য প্ৰদৰ্শনৰ বাবে যোৱা 28 নৱেম্বৰত দুৰ্গ জিলাৰ ভিলাইত উপস্থিত হৈছিলহি তেওঁ ৷
আৰক্ষীয়ে প্ৰকাশ কৰা তথ্যনুসৰি, 3 ডিচেম্বৰত অনুষ্ঠান সমাপ্তিৰ পিছত শিল্পীগৰাকী 4 ডিচেম্বৰত মুম্বাইলৈ যোৱাৰ কথা আছিল ৷
সেই অনুসৰি 4 ডিচেম্বৰৰ বিয়লি কমলেশ,ৰাজ আৰু কবীৰে মহিলাগৰাকীক ৰায়পুৰত গাড়ীৰে থৈ অহাৰ বাবে প্ৰস্তাৱ দিছিল ৷
কিন্তু অভিযুক্তকেইটাই আহিৱাৰা ৰোডৰ এক নিৰ্জন স্থানত গাড়ীখন ৰখাই মহিলাগৰাকীক ধৰ্ষণ কৰি ৰায়পুৰত এৰি থৈ যায় ৷
ঘটনা সংঘটিত হোৱাৰ পাছত মহিলাগৰাকীয়ে কোনোমতে ভিলাইত উপস্থিত হৈ চাৰি ধৰ্ষণকাৰীৰ বিৰুদ্ধে সুপিলা আৰক্ষী থানাত গোচৰ ৰুজু কৰে ৷
ইফালে আৰক্ষীয়ে জানিবলৈ দিয়া অনুসৰি, কবীৰ আৰু কুমাৰক আটক কৰাৰ বাবে অভিযান অব্যাহত আছে ৷
