বাংলাদেশত গ্ৰেপ্তাৰ পশ্চিমবংগৰ যুৱতী, জামাতুল মুজাহিদীনৰ সৈতে সম্পৰ্ক

পশ্চিমবংগৰ এগৰাকী যুৱতীক বাংলাদেশৰ সন্ত্ৰাসাবাদ বিৰোধী গোটে গ্ৰেপ্তাৰ কৰে ৷ জামাতুল মুজাহিদীনৰ সৈতে সম্পৰ্ক আছিল প্ৰজ্ঞা দেৱনাথ নামৰ যুৱতীগৰাকীৰ ৷

নিউজ ডেস্ক, 18 জুলাই : বাংলাদেশত গ্ৰেপ্তাৰ হয় এগৰাকী পশ্চিমবংগৰ যুৱতী ৷ বাংলাদেশৰ ৰাজধানী চহৰ ঢাকাৰ পৰা দেশখনৰ সন্ত্ৰাসবাদ বিৰোধী গোটে গ্ৰেপ্তাৰ কৰে পশ্চিমবংগৰ প্ৰজ্ঞা দেৱনাথ নামৰ যুৱতীগৰাকীক ৷ বাংলাদেশৰ সন্ত্ৰাসবাদ বিৰোধী গোটৰ বিষয়া এছকে ইমৰান হুছেইনে প্ৰকাশ কৰিছে এই তথ্য ৷ হিন্দু পৰিয়ালত জন্মগ্ৰহণ কৰা যুৱতীগৰাকীয়ে 2009 চনত ইছলাম ধৰ্ম গ্ৰহণ কৰি আয়েশা নাম লয় ৷

যুৱতীগৰাকীয়ে বাংলাদেশৰ জামাতুল মুজাহিদীন সন্ত্ৰাসবাদী সংগঠনটোৰ মহিলা শাখাৰ বাবে কাম কৰি আহিছিল ৷ ভাৰতত সন্ত্ৰাসবাদী সংগঠনটোৰ মহিলা নিযুক্তিৰ বাবে দায়িত্ব লাভ কৰিছিল প্ৰজ্ঞাই ৷ পৰৱৰ্তী সময়ত বাংলাদেশৰ চোৰাংচোৱাই এই বিষয়ে তথ্য লাভ কৰে ৷

বৰ্তমানে আয়েশা জন্নত মোহনা নাম লৈ বাংলাদেশৰ পৰা সন্ত্ৰাসবাদমুলক কাৰ্যকলাপ সংঘটিত কৰি আহিছিল যুৱতীগৰাকীয়ে ৷ অৱশেষত বাংলাদেশৰ সন্ত্ৰাসবাদ বিৰোধী গোটৰ অভিযানত শনিবাৰে ধৰা পৰে যুৱতীগৰাকী ৷ বৰ্তমানে যুৱতীগৰাকীক চাৰিদিনৰ জিম্মাত লৈছে অনুসন্ধানকাৰী সংস্থাটোৱে ৷

সংস্থাটোৰ প্ৰাৰম্ভিক অনুসন্ধানত প্ৰজ্ঞাৰ ঘৰ পশ্চিমবংগৰ হুগলি জিলাত বুলি জানিব পৰা গৈছে ৷ ধনিয়াখালি আৰক্ষী চকীৰ অন্তৰ্গত কেছৱপুৰ গাঁৱত প্ৰজ্ঞাৰ ঘৰ বুলি জানিব পৰা গৈছে ৷

লগতে পঢ়কঃ লক্ষ্নৌ ঘটনাত জড়িত এমআইএম নেতাৰ সৈতে 4 জন ধৃত