নাহৰকটীয়াত বিবাহিত পুৰুষৰ কামনাৰ বলি নাবালিকা

তৃতীয় শ্ৰেণীত অধ্যয়নৰত আছিল নাবালিকা গৰাকী ৷ অভিযুক্ত দিপল ৰংচোৱাল ওৰফে বাবাটু আটক ৷

নাহৰকটীয়া, 21 নৱেম্বৰ: ৰাজ্যত পুনৰ সংঘটিত হৈছে নাবালিকা নিৰ্যাতনৰ দৰে জঘন্য ঘটনা ৷ এইবাৰ ডিব্ৰুগড় জিলাৰ নাহৰকটীয়াত এজন বিবাহিত পুৰুষৰ কামনাৰ বলি হ'ল তৃতীয় শ্ৰেণীত অধ্যয়নৰত এগৰাকী নাবালিকা ৷ এই জঘন্য ঘটনা সংঘটিত হৈছে যোৱা 16 নৱেম্বৰৰ নিশা ৷ ঘটনা অনুসৰি ঘৰত কোনো নথকাৰ সুযোগ গ্ৰহণ কৰি দুষ্কাৰ্য সংঘটিত কৰিছিল নাবালিকা গৰাকীৰ চুবুৰীয়া দিপল ৰংচোৱাল ওৰফে বাবাটুৱে ৷ কিন্তু ঘটনাৰ পাছৰ পৰাই অভিযুক্ত বাবাটুৱে নিৰ্যাতিত কিশোৰী গৰাকীৰ পৰিয়ালক ভাবুকি প্ৰদান কৰি অহাৰ ফলতে পৰিয়ালটোৱে আৰক্ষীৰ কাষ চাপিবলৈ সাহস কৰা নাছিল ৷ অৱশেষত বুধবাৰে জিলা মহিলা আৰু শিশু কল্যাণ কোষৰ লগতে ছাত্ৰীগৰাকীয়ে অধ্যয়ন কৰা বিদ্যালয়ৰ শিক্ষয়িত্ৰীসকলৰ সহযোগত ভুক্তভোগী পৰিয়ালটোৱে নাহৰকটীয়া আৰক্ষী থানাত গোচৰ ৰুজু কৰে ৷ আৰক্ষীয়ে পক্‌চ’ আইনৰ অধীনত ইতিমধ্যে অপৰাধীক কৰায়ত্ত কৰিছে ৷ নাবালিকাৰ পৰিয়ালৰ লগতে তেওঁ অধ্যয়ন কৰা বিদ্যালয়খনৰ শিক্ষয়িত্ৰীসকলে অভিযুক্তক কঠোৰতম শাস্তি বিহিবলৈ আৰক্ষীক অনুৰোধ জনাইছে ৷

আৰু পঢ়ক: অৱসৰ পাচত গুৱাহাটীত উপস্থিত প্ৰাক্তন মুখ্য ন্যায়াধীশ ৰঞ্জন গগৈ