এমআইএমৰ নেতাৰ গুলীত আঘাতপ্ৰাপ্ত হোৱা চৈয়দ জমীৰৰ মৃত্য়ু

আছাদউদ্দিন ওৱেছিৰ দল অল ইণ্ডিয়া মজলিছ-ই-ইট্টেহাদুল মুছলিমেনৰ এগৰাকী শীৰ্ষ নেতাৰ গুলীত গুৰুতৰভাৱে আঘাতপ্ৰাপ্ত হৈছিল চৈয়দ জমীৰ ৷ শনিবাৰে হায়দৰাবাদৰ নিজাম ইনষ্টিটিউট অৱ মেডিকেল চায়েন্সত চিকিৎসাধীন অৱস্থাতে মৃত্যুক সাৱতি লয় জমীৰে ৷

নিউজ ডেস্ক, 26 ডিচেম্বৰ : হায়দৰাবাদৰ সাংসদ আছাদউদ্দিন ওৱেচিৰ অল ইণ্ডিয়া মজলিছ-ই-ইট্টেহাদুল মুছলিমেন দলৰ আদিলাবাদ জিলা সভাপতি মহম্মদ ফাৰুকৰ নিৰ্বিচাৰ গুলীচালনাত আঘাতপ্ৰাপ্ত হোৱা চৈয়দ জমীৰৰ শনিবাৰে মৃত্যু হয় ৷ বিগত 18 ডিচেম্বৰত আদিলাবাদত সাধাৰণ কথাতে চৈদয় জমীৰ আৰু তেওঁৰ ভাতৃ চৈয়দ মান্নান তথা ভতিজা চৈয়দ মহটেছিক যধে-মধে আক্ৰমণ কৰিছিল এমআইএমৰ নেতা মহম্মদ ফাৰুকে ৷ গুলীচালনাৰ লগতে উপৰ্যুপৰি চুৰিকাঘাত কৰিছিল ফাৰুকে ৷

এমআইএম নেতা ফাৰুকৰ এই আক্ৰমণৰ ফলত গুৰুতৰভাবে আঘাতপ্ৰাপ্ত হৈছিল জমীৰ আৰু তেওঁৰ ভাতৃ মান্নান ৷ তেওঁলোকক হায়দৰাবাদৰ নিজাম ইনষ্টিটিউট অৱ মেডিকেল চায়েন্সত ভৰ্তি কৰোৱা হৈছিল ৷ কিন্তু শনিবাৰে দিনৰ ভাগত মৃত্য়ু ঘটে চৈয়দ জমীৰৰ ৷ জমীৰ আদিলাবাদৰ টাটিগুড়াৰ এগৰাকী প্ৰাক্তন কাউন্সিলৰ আছিল ৷ ৰাজনৈতিক কাৰণতে এমআইএম নেতা ফাৰুকে আক্ৰমণ কৰিছিল জমীৰক ৷

সমগ্ৰ আক্ৰমণৰ ঘটনা ছ'চিয়েল মিডিয়াত ভাইৰেল হৈ পৰিছিল ৷ ভিডিঅ’টোত ফাৰুকে নিৰ্বিচাৰে জমীৰ আৰু তেওঁৰ ভাতৃৰ লগতে ভতিজাকক নিজৰ অনুজ্ঞাপত্ৰযুক্ত ৰিভলভাৰ আৰু চোকা অস্ত্ৰৰে আক্ৰমণ কৰা দেখিবলৈ পোৱা গৈছিল ৷

এই ঘটনাৰ পিচতেই আৰক্ষীয়ে হত্যাৰ অভিসন্ধিৰ গোচৰত আটক কৰিছিল ফাৰুকক ৷ আনহাতে জমীৰৰ মৃত্যুৰ পিচতেই তেওঁৰ বিৰুদ্ধে হত্যাৰ গোচৰ ৰুজু কৰিছে বুলি জানিব পৰা গৈছে ৷ ইতিমধ্যে স্থানীয় আৰক্ষীয়ে ফাৰুকৰ ৰিভলভাৰৰ অনুজ্ঞাপত্ৰ বাতিল কৰিবলৈ জিলা উপায়ুক্তলৈ জাননী প্ৰেৰণ কৰিছে ৷

এই ঘটনাৰ পিচতেই ফাৰুকক লৈ এতিয়ালৈকে কোনো মন্তব্য দিয়া নাই আছাদউদ্দিন ওৱেচিয়ে ৷ অৱশ্যে ফাৰুকক দলৰ পৰা বহিষ্কাৰ কৰিয়ে দায়িত্ব সামৰিছে মৌলবাদী ৰাজনৈতিক দলটোৱে ৷

লগতে পঢ়ক : পুৰণি হায়দৰাবাদত পাকিস্তানী আছে যদি ,দায়ী প্ৰধানমন্ত্ৰী আৰু গৃহমন্ত্ৰী : ওৱেইছি