শিলচৰ, 18 ফেব্ৰুৱাৰী : গোপন তথ্যৰ ভিত্তিত অভিযান চলাই কাছাৰ আৰক্ষীয়ে বুধবাৰে বুজন পৰিমাণৰ মনিপুৰী গাঞ্জা জব্দ কৰিছে ৷ অসম-মনিপুৰ সীমান্তৰ জিৰিঘাটত নাকা চেকিং কৰাৰ সময়ত আৰক্ষীয়ে মনিপুৰৰ পৰা অহা এখন ট্ৰাকৰ গোপন কেবিনৰ পৰা জব্দ কৰে গাঞ্জাখিনি ৷ 16 টা পেকেটত থকা গাঞ্জা খিনিৰ পৰিমাণ 150 কিলোগ্ৰাম বুলি সদৰী কৰিছে কাছাৰৰ অতিৰিক্ত অধীক্ষক জগদীশ দাসে ৷ MNO1-7164 নম্বৰৰ ট্ৰাক খনৰ পৰা জব্দ কৰা গাঞ্জা খিনিৰ মূল্য প্ৰায় বাৰ লাখ টকা হ'ব বুলি জানিব পৰা গৈছে ৷
গাঞ্জাৰ ট্ৰাকৰ লগতে ASO1DV-3492 নম্বৰৰ এখন ইনভা বাহনো জব্দ কৰিছে আৰক্ষীয়ে ৷ লক্ষীপুৰৰ SDPO অনুৰাগ শৰ্মা আৰু জিৰিঘাট থানাৰ OC সৌমাৰজ্যোতি ৰয়ৰ নেতৃত্বত চলা এই অভিযানত ট্ৰাকৰ চালকসহ চাৰিজন গাঞ্জা সৰবৰাহকাৰীক গ্ৰেপ্তাৰ কৰা হয় ৷ ধৃত লোক চাৰিজনৰ ভিতৰত দুজনৰ ঘৰ মনিপুৰত আৰু বাকী দুজনৰ ঘৰ কাছাৰৰ ফুলৰতলত বুলি জানিবলৈ দিয়ে আৰক্ষী অধীক্ষক জগদীশ দাসে ৷
