বৰপেটা চহৰত আটক বহিঃ ৰাজ্যৰ চিলনী চোৰ

বৰপেটা চহৰত এগৰাকী অৱসৰপ্ৰাপ্ত শিক্ষকৰ টকাৰ বেগ কাঢ়ি লৈ পলাওতেই স্থানীয় লোকে আটক কৰিবলৈ সক্ষম হয় এটা চিলনী চোৰক ৷ বৰপেটা চহৰৰ পাঁচআলি চ'কত এজন অৱসৰপ্ৰাপ্ত শিক্ষকৰ গাত বান্দৰকেঁকোৱা চটিয়াই একলাখ টকাসহ বেগ কাঢ়ি পলাইছিল চোৰটোৱে

বৰপেটা,11 জুনঃ পশ্চিমবংগ,বিহাৰ আদি ৰাজ্যৰ একাংশ দুৰ্বৃত্তই অসমত খোপনি পুতি বিভিন্ন সময়ত অপৰাধমূলক কাৰ্য সংঘটিত কৰি আহিছে ৷ বিশেষকৈ চুৰি,ডকাইতিৰ উপৰিও ৰাজপথৰ পৰা টকাৰ বেগ, ডিঙিৰ চেইন আদি কাঢ়ি নিয়াৰ ঘটনা সংঘটিত কৰি একপ্ৰকাৰ সন্ত্ৰাস চলাইছে বহিঃ ৰাজ্যৰ এইসকল দুৰ্বৃত্তই ৷ বৰপেটা চহৰত এগৰাকী অৱসৰপ্ৰাপ্ত শিক্ষকৰ টকাৰ বেগ কাঢ়ি লৈ পলাওতেই স্থানীয় লোকে আটক কৰিবলৈ সক্ষম হয় এটা চিলনী চোৰক ৷ বৰপেটা চহৰৰ পাঁচআলি চ'কত এজন অৱসৰপ্ৰাপ্ত শিক্ষকৰ গাঁত বান্দৰকেঁকোৱা চটিয়াই একলাখ টকাসহ বেগ কাঢ়ি পলাইছিল চোৰটোৱে ৷ তাৰপিচতে শিক্ষকজনে চিঞৰ-বাখৰ কৰাত স্থানীয় লোকে খেদি গৈ চোৰটোক আটক কৰি গটাই দিয়ে আৰক্ষীক ৷ পশ্চিমবংগৰ জলপাইগুৰিৰ ধৃত চোৰটোৰ নাম প্ৰমোদ গোৱালা ৷

উল্লেখ্য যে, সৰুক্ষেত্ৰীৰ যশোদাৰপাম গাঁৱৰ ধীৰেন্দ্ৰ নাথ মণ্ডল নামৰ এইগৰাকী অৱসৰপ্ৰাপ্ত শিক্ষকে মঙলবাৰে বৰপেটা চহৰৰ ষ্টেটবেংকৰ পৰা উলিয়াই আনিছিল একলাখ টকা ৷ টকাখিনি এটা বেগত ভৰাই চহৰৰ পাঁচআলি চ'কলৈ আহি থকা অৱস্থাতে সংঘটিত হয় এই ঘটনা ৷ ইয়াৰ পূৰ্বেও বৰপেটাত কেইবাটাও চিলনী চোৰ আটক কৰিছিল স্থানীয় ৰাইজে ৷ পিছে চিলনী চোৰৰ সন্ত্ৰাস ৰোধ কৰাত স্থানীয় আৰক্ষী ব্যৰ্থ হোৱাৰ অভিযোগ বৰপেটাবাসীৰ ৷

লগতে পঢ়কঃ তিনিচুকীয়াৰ হিজুগুৰিত আটক দুই মবাইল চোৰ