ইণ্টাৰনেচনেল ডেস্ক, ১৬ জুন : আমেৰিকা যুক্তৰাষ্ট্ৰৰ বিদেশ বিভাগৰ চৰকাৰী মুখপাত্ৰ মেথিউ মিলাৰে বৃহস্পতিবাৰে এক সংবাদমেলত কয় যে আমেৰিকা যুক্তৰাষ্ট্ৰৰ কনছুলাৰ দলে ভাৰতত যিমান সম্ভৱ সিমান ভিছা আবেদন প্ৰক্ৰিয়া কৰাৰ বাবে এক বৃহৎ প্ৰচেষ্টা চলাই আহিছে । তেওঁ এই প্ৰচেষ্টাক মাৰ্কিন চৰকাৰৰ বাবে শীৰ্ষ অগ্ৰাধিকাৰৰ বিষয় বুলি অভিহিত কৰে । লগতে কয় যে আৰু অধিক ভিছা প্ৰদানৰ কাম কৰিব পৰা যায় ।
উল্লেখ্য, প্ৰধানমন্ত্ৰী নৰেন্দ্ৰ মোদীৰ আগন্তুক আমেৰিকা ভ্ৰমণৰ সময়ত কূটনীতি, প্ৰব্ৰজন আৰু ভিছা সমস্যা সন্দৰ্ভত ভাৰতে আমেৰিকাৰ পৰা কি আশা কৰিব পাৰে বুলি সোধাত মেথিউ মিলাৰে কয়, "ভিছা সন্দৰ্ভত আমাৰ কনছুলাৰ দলে ভাৰতত যিমান সম্ভৱ সিমান ভিছা আবেদন প্ৰক্ৰিয়া কৰাৰ বাবে যথেষ্ট জোৰ দি আহিছে । ইয়াৰ ভিতৰত দ্বিপাক্ষিক সম্পৰ্কৰ বাবে মুখ্য বিষয় হিচাপে বিবেচনা কৰা ভিছা কেটেগৰিও আছে । এইটো আমাৰ চৰকাৰৰ বাবে এক শীৰ্ষ অগ্ৰাধিকাৰ ।" "আমি জানো যে আমি আৰু অধিক কাম কৰিব পাৰোঁ । সেয়া কৰিবলৈ আমি কঠোৰ পৰিশ্ৰম কৰি আছোঁ ।" তেওঁ লগতে কয় ।
একেখন সংবাদমেলতে মেথিউ মিলাৰে ভাৰতৰ সৈতে আমেৰিকা যুক্তৰাষ্ট্ৰৰ অংশীদাৰিত্বক 'আটাইতকৈ ফলপ্ৰসূ সম্পৰ্ক' বুলি অভিহিত কৰে আৰু লগতে কয় যে দুয়োখন ৰাষ্ট্ৰই আটাইতকৈ গুৰুত্বপূৰ্ণ অগ্ৰাধিকাৰৰ ওপৰত ঘনিষ্ঠভাৱে কাম কৰি আহিছে ।
উল্লেখ্য যে প্ৰধানমন্ত্ৰী নৰেন্দ্ৰ মোদীয়ে অহা ২১-২৪ জুনলৈকে আমেৰিকা ভ্ৰমণ কৰিবলৈ সাজু হৈছে । প্ৰধানমন্ত্ৰী নৰেন্দ্ৰ মোদীক আমেৰিকা যুক্তৰাষ্ট্ৰৰ ৰাষ্ট্ৰপতি জো বাইডেন আৰু ফাৰ্ষ্ট লেডী জিল বাইডেনে হোৱাইট হাউছত এক ৰাষ্ট্ৰীয় নৈশ ভোজত আতিথ্য প্ৰদান কৰিব । বৈদেশিক পৰিক্ৰমা মন্ত্ৰালয়ৰ পূৰ্বৰ এক প্ৰেছ বিজ্ঞপ্তিত এই ঘোষণা কৰে ।
এই ভ্ৰমণকালত প্ৰধানমন্ত্ৰী মোদীয়ে ৱাশ্বিংটনৰ জন এফ কেনেডি চেণ্টাৰত আমেৰিকাৰ শীৰ্ষ কোম্পানীসমূহৰ অধ্যক্ষ আৰু মুখ্য কাৰ্যবাহী বিষয়াসকলকো সম্বোধন কৰিব । এই ভ্ৰমণকালত তেওঁ দ্বিতীয়বাৰৰ বাবে আমেৰিকা যুক্তৰাষ্ট্ৰৰ কংগ্ৰেছৰ যুটীয়া বৈঠকত ভাষণ প্ৰদান কৰিব । শেহতীয়াকৈ প্ৰধানমন্ত্ৰী মোদীয়ে প্ৰকাশ কৰিছে যে তেওঁ এই আমন্ত্ৰণ গ্ৰহণ কৰি সন্মানিতবোধ কৰিছে আৰু ২২ জুনত আমেৰিকা যুক্তৰাষ্ট্ৰৰ কংগ্ৰেছৰ এখন যুটীয়া বৈঠকত ভাষণ দিবলৈ অধীৰ আগ্ৰহেৰে অপেক্ষা কৰি আছে ।
লগতে পঢ়ক :USISPF chief on India US relation : ভাৰত আৰু আমেৰিকাৰ দ্বিপাক্ষিক সম্পৰ্ক জনসাধাৰণৰ বাবে লাভজনক
