ইণ্টাৰনেচনেল ডেস্ক, ১ ছেপ্টেম্বৰ : পাকিস্তানৰ তত্ত্বাৱধায়ক চৰকাৰে প্ৰতি লিটাৰত পেট্ৰ'লৰ মূল্য ১৪.৯১ টকা আৰু উচ্চ গতিৰ ডিজেলৰ (এইচএছডি) মূল্য প্ৰতি লিটাৰত ১৮.৪৪ টকা বৃদ্ধি কৰিছে । পাকিস্তানী ইংৰাজী দৈনিক বাতৰিকাকত ডনৰ সূত্ৰত এই কথা প্ৰকাশ । বিত্ত মন্ত্ৰালয়ে বৃহস্পতিবাৰে মাজনিশা এক্সত (পূৰ্বতে টুইটাৰ) এটা পোষ্টত কয় যে শেহতীয়া মূল্যবৃদ্ধিৰ ফলত পেট্ৰ'লৰ মূল্য বৰ্তমান প্ৰতি লিটাৰত ৩০৫.৩৬ টকা আৰু এইচএছডিৰ মূল্য প্ৰতি লিটাৰত ৩১১.৮৪ টকা হৈছে ।
কেৰাচিন বা পাতল ডিজেল তেলৰ মূল্যত অৱশ্যে কোনো সংশোধন কৰা হোৱা নাই । উল্লেখ্য যে এই মূল্যবৃদ্ধি ইতিমধ্যে ১৫ আগষ্টত কৰা বৃহৎ বৃদ্ধিৰ পিছত আহিছে । ১৫ আগষ্টত অন্তৰ্ৱৰ্তীকালীন চৰকাৰখনে ইন্ধনৰ মূল্য প্ৰতি লিটাৰত ২০ টকালৈকে বৃদ্ধি কৰিছিল । ডনৰ মতে, পূৰ্বৰ চৰকাৰে আগষ্টৰ ১ তাৰিখে পেট্ৰ'লিয়ামৰ মূল্য বৃদ্ধিৰ পিছত উক্ত বৃদ্ধি কৰে ।
উল্লেখ্য যে মূল্যবৃদ্ধি প্ৰচলিত কৰৰ হাৰ আৰু আমদানি সমতাৰ মূল্যৰ ওপৰত ভিত্তি কৰি হয় । মুখ্যত মুদ্ৰাৰ মূল্য হ্ৰাস আৰু আন্তৰ্জাতিক তেলৰ মূল্য সামান্য বৃদ্ধিৰ বাবে এই বৃদ্ধি হয় । শুকুৰবাৰেও পাকিস্তানৰ টকাৰ মূল্যৰ লোকচান বৃদ্ধি অব্যাহত আছে । আন্তঃবেংক বজাৰত আমেৰিকান ডলাৰৰ বিপৰীতে পাকিস্তানৰ টকাৰ মূল্য ১.০৯ টকালৈ হ্ৰাস পায় । ই ৩০৫.৫৪ টকাৰ অভিলেখ নিম্ন হাৰত বন্ধ হয় ।
ইফালে ডনে শেহতীয়াকৈ প্ৰকাশ কৰা চৰকাৰী তথ্য অনুসৰি, ১৭ আগষ্টত সমাপ্ত হোৱা সপ্তাহটোৰ বাবে পাকিস্তানৰ হ্ৰস্বম্যাদী মুদ্ৰাস্ফীতি বাৰ্ষিক ভিত্তিত ২৭.৫৭ শতাংশ বৃদ্ধি পাইছে, মুখ্যত পেট্ৰ'লিয়ামৰ মূল্যবৃদ্ধিৰ বাবে । অৱশ্যে মুদ্ৰাস্ফীতি পূৰ্বৰ সপ্তাহৰ ৩০.৮২ শতাংশৰ তুলনাত হ্ৰাস পাইছে ।
সপ্তাহৰ ভিত্তিত সংবেদনশীল মূল্য সূচকৰ (Sensitive Price Index) দ্বাৰা নিৰ্ধাৰণ কৰা সাপ্তাহিক মুদ্ৰাস্ফীতি ০.৭৮ শতাংশ বৃদ্ধি পাইছে, যিটোৱে বিগত চাৰি সপ্তাহ ধৰি বৰ্ধিত প্ৰৱণতা দেখুৱাইছে ।
লগতে পঢ়ক :Congo clashes : সেনা আৰু প্ৰতিবাদকাৰীৰ সংঘৰ্ষত ২৬ জনৰ মৃত্যু
