ইণ্টাৰনেশ্যনেল ডেস্ক,২৩ অক্টোবৰ : স্থল আক্ৰমণৰ বাবে সাজু ইজৰাইল । ৭ অক্টোবৰৰ হামাছৰ ভয়ংকৰ আক্ৰমণৰ পাছতে কেইবাটাও সকীয়নি প্ৰদান কৰিছে ইজৰাইলে । কেৱল সকীয়নিয়ে নহয় ইতিমধ্যে হামাছৰ বিৰুদ্ধে গাজা ষ্ট্ৰিপত বিমান আক্ৰমণো অব্যাহত ৰাখিছে ইজৰাইলে । ইজৰাইলী যুদ্ধ বিমানে গাজা ষ্ট্ৰিপৰ লগতে ছিৰিয়াৰ দুটাকৈ বিমানবন্দৰ আৰু অধিকৃত পশ্চিম তীৰৰ এটা মছজিদত আক্ৰমণ কৰিছে । ইজৰাইলৰ সামৰিক মুখপাত্ৰই কোৱা মতে দেশখনে আক্ৰমণ বৃদ্ধি কৰিছে । লগে লগে স্থল আক্ৰমণৰ আশংকাও বৃদ্ধি পাইছে ।
ইফালে ইজৰাইলৰ আসন্ন স্থল আক্ৰমণৰ ভাবুকি দিয়াৰ লগে লগে দুয়োপক্ষৰ বাবে যোৱা ৫ টা গাজা যুদ্ধৰ ভিতৰত ই আটাইতকৈ ভয়ংকৰ হিচাপে পৰিগণিত হৈছে । পেলেস্তাইনী স্বাস্থ্য মন্ত্ৰালয়ে দেওবাৰে কোৱা মতে গাজাত মৃত্যুৰ সংখ্যা ৪,৬৫১ লৈ বৃদ্ধি পাইছে । ইফালে আন আন আৱদ্ধ অঞ্চলত ১৪,২৫৪ৰো অধিক লোক আহত হৈছে ।
মন্ত্ৰালয়ে লগতে কয় যে ৭ অক্টোবৰত হামাছ সন্ত্ৰাসবাদীয়ে ইজৰাইলত প্ৰৱেশ কৰাৰ পাছত অধিকৃত পশ্চিম তীৰত হিংসা আৰু ইজৰাইলৰ অভিযানত ৯৩ গৰাকী পেলেস্তাইনীও নিহত হৈছে । য'ত ১,৬৫০ ৰো অধিক লোক আহত হৈছে । ইফালে ইজৰাইলত ১,৪০০ৰো অধিক লোক নিহত হৈছে । তাৰ বেছিভাগ হামাছৰ প্ৰাৰম্ভিক আক্ৰমণত নিহত হৈছে । ইয়াৰ উপৰিও, আক্ৰমণৰ সময়ত হামাছে ২০৩ গৰাকী লোকক বন্দী কৰিছিল আৰু গাজালৈ লৈ যোৱা হৈছিল বুলি ইজৰাইলী সামৰিক বাহিনীয়ে দাবী কৰিছিল ।
অৱশ্যে আমেৰিকা যুক্তৰাষ্ট্ৰৰ অনুৰোধত আৰু আন ৰাজনৈতিক বিষয়াসকলৰ নিৰ্দেশনা অনুসৰি গাজাত দ্বিতীয়টো মানৱীয় সাহায্যৰ পেকেজৰ অনুমতি দিয়া হৈছে । দেওবাৰে আবেলি মানৱীয় সাহায্যৰ দ্বিতীয় কনভয় ইজিপ্তৰ পৰা গাজালৈ পাৰ হ'বলৈ আৰম্ভ কৰিছে বুলিও জানিব পৰা গৈছে ।
