নিউজ ডেস্ক, ২৬ ডিচেম্বৰ: ভাৰতীয় নৌসেনাৰ বিস্ফোৰক প্ৰতিৰোধী এটা দলে সোমবাৰে মুম্বাইত উপস্থিত হোৱা আৰব সাগৰত ড্ৰ’ন আক্ৰমণৰ সন্মুখীন হোৱা বণিক জাহাজ এম ভি কেম প্লুটো পৰিদৰ্শন কৰে । নৌসেনাৰ বিষয়াসকলে কয় যে আক্ৰমণৰ স্থান আৰু জাহাজখনত পোৱা ধ্বংসাৱশেষৰ বিশ্লেষণে ড্ৰ’ন আক্ৰমণৰ ইংগিত দিয়ে আৰু সকলো সবিশেষ জানিবলৈ অধিক ফৰেনছিক আৰু কাৰিকৰী বিশ্লেষণৰ প্ৰয়োজন হ’ব ।
নৌসেনাই কৰা বিশ্লেষণত নিশ্চিত হৈছে যে ভাৰতৰ উপকূলৰ পৰা ৪০০ কিলোমিটাৰ দূৰত্বত ড্ৰ’নৰ আক্ৰমণত এম ভি কেম প্লুটো ক্ষতিগ্ৰস্ত হৈছে । কেইবাখনো ফটোত জাহাজখনৰ পিছফালৰ অংশৰ ক্ষতি হোৱা দেখা গৈছে । উল্লেখ্য যে, শনিবাৰে পোৰবন্দৰৰ পৰা প্ৰায় ২১৭ নটিকেল মাইল দূৰত ২১ জন ভাৰতীয় ক্ৰু মেম্বাৰ কঢ়িয়াই অনা এখন বাণিজ্যিক জাহাজত ড্ৰোন আক্ৰমণ সংঘটিত হয় আৰু তাৰ পিছত ভাৰতীয় নৌসেনা আৰু ভাৰতীয় উপকূলৰক্ষী বাহিনীয়ে জাহাজখনক সাহায্য প্ৰদানৰ বাবে কেইবাখনো জাহাজ নিয়োগ কৰে ।
বিষয়াসকলে কয় যে শেহতীয়াকৈ বাণিজ্যিক জাহাজত হোৱা আক্ৰমণৰ পৰিপ্ৰেক্ষিতত নৌসেনাই অঞ্চলটোত নিজৰ প্ৰতিৰোধমূলক উপস্থিতি বজাই ৰাখিবলৈ যুদ্ধজাহাজ আই এন এছ মৰ্মুগাও, আই এন এছ কোচি আৰু আই এন এছ কলকাতা মোতায়েন কৰিছে। তেওঁ কয় যে দীৰ্ঘ দূৰত্বৰ সামুদ্ৰিক গোপনীয়তা বিমান পি ৮ আইও নিয়োগ কৰা হৈছে ।
এই আক্ৰমণৰ পাচত পেন্টাগনে দাবী কৰে যে ইৰাণৰ পৰা নিক্ষেপ কৰা ড্ৰ’নে টেংকাৰ জাহাজখনক লক্ষ্য কৰি লৈছিল । তেহৰাণ সমৰ্থিত হামাছৰ বিৰুদ্ধে ইজৰাইলৰ যুদ্ধ আৰম্ভ হোৱাৰ পিচত এইবাৰ প্ৰথমবাৰৰ বাবে পেন্টাগনে ইৰাণক প্ৰত্যক্ষভাৱে জাহাজসমূহক লক্ষ্য কৰি লোৱাৰ অভিযোগ উত্থাপন কৰিছে ।
ইফালে ইজৰাইল-হামাছ যুদ্ধ আৰম্ভ হোৱাৰ পিচৰে পৰা লোহিত সাগৰৰ গুৰুত্বপূৰ্ণ জাহাজ লেনত য়েমেনৰ ইৰাণ সমৰ্থিত হাউথী বিদ্ৰোহীয়ে নতুন ড্ৰ’ন আৰু মিছাইল আক্ৰমণৰ মাজতে এই আক্ৰমণ সংঘটিত কৰে । হাউথী বিদ্ৰোহীয়ে গাজাৰ সৈতে সংহতিৰে কাম কৰা বুলি দাবী কৰিছে ৷
জানিব পৰা মতে, এম ভি কেম প্লুটোৱে ছৌদি আৰৱৰ আল জুবাইল বন্দৰৰ পৰা নিউ মাংগালুৰু বন্দৰলৈ খাৰুৱা তেল কঢ়িয়াই আনিছিল । এম ভি কেম প্লুটোক মুম্বাইত থকা কোম্পানীটোৰ ভাৰপ্ৰাপ্ত বিষয়াই অধিক পৰিচালনাৰ বাবে অনুমোদন জনাইছে ।
জাহাজখনৰ সামগ্ৰীসমূহ স্থানান্তৰ কৰাৰ পূৰ্বে জাহাজখন বিভিন্ন পৰিদৰ্শন কৰ্তৃপক্ষৰ দ্বাৰা বাধ্যতামূলক পৰিদৰ্শন কৰোৱা হ’ব আৰু ইয়াৰ পিছত ইয়াৰ ক্ষতিগ্ৰস্ত অংশ মেৰামতি কৰাৰ সম্ভাৱনা আছে ।
লগতে পঢ়ক: ভাৰত অভিমুখী ৰাসায়নিক সামগ্ৰীৰ টেংকাৰত ইৰাণে আক্ৰমণ কৰাৰ দাবী আমেৰিকাৰ
