ইণ্টাৰনেচনেল ডেস্ক, ১১ নৱেম্বৰ : ইজৰাইলী প্ৰতিৰক্ষা বাহিনীৰ (আইডিএফ) ৪০১ নম্বৰ ব্ৰিগেডে প্ৰায় ১৫০ জন হামাছ সন্ত্ৰাসবাদীক হত্যা কৰিছে । লগতে উত্তৰ গাজাস্থিতত হামাছৰ দুৰ্গত নিয়ন্ত্ৰণ লাভ কৰিছে । উল্লেখ্য যে ৪০১ ব্ৰিগেড হৈছে আইডিএফৰ আটাইতকৈ কম বয়সীয়া ব্ৰিগেডসমূহৰ ভিতৰত এটা । "৪০১ ব্ৰিগেডে প্ৰায় ১৫০ জন সন্ত্ৰাসবাদীক হত্যা কৰিছে আৰু উত্তৰ গাজাত হামাছ সন্ত্ৰাসবাদীৰ দুৰ্গৰ ওপৰত নিয়ন্ত্ৰণ লাভ কৰিছে । আক্ৰমণৰ লক্ষ্যস্থানবোৰৰ ভিতৰত আছিল এটা অস্ত্ৰ উৎপাদন স্থান, উৎক্ষেপণ কেন্দ্ৰ আৰু এটা ভূগৰ্ভস্থ নেটৱৰ্ক ।" আইডিএফে এক্সত শ্বেয়াৰ কৰা এটা পোষ্টত এই কথা প্ৰকাশ কৰিছে ।
আনহাতে, ইয়াৰ পূৰ্বৰ এটা পোষ্টত ইজৰাইল ডিফেন্স ফ'ৰ্চে এক্সত লিখিছিল যে আইডিএফৰ বিমানে বিগত দিনটোত উৎক্ষেপণৰ প্ৰতিক্ৰিয়াস্বৰূপে লেবাননৰ হিজবুল্লাৰ সন্ত্ৰাসবাদী লক্ষ্যত আক্ৰমণ কৰিছিল । লক্ষ্যস্থানসমূহৰ ভিতৰত আছে সন্ত্ৰাসবাদী আন্তঃগাঁথনি, সামৰিক চকী, অস্ত্ৰ ভাণ্ডাৰ আৰু চোৰাংচোৱা আন্তঃগাঁথনি । উল্লেখ্য যে আইডিএফৰ হাতত নিধন হোৱা সন্ত্ৰাসবাদীসকলৰ ভিতৰত আছে নাকবা গোটৰ কমাণ্ডাৰ আহমেদ মুছা আৰু পশ্চিম জাবালিয়াত সোমাই থকা এটা সন্ত্ৰাসবাদী প্লাটুনৰ কমাণ্ডাৰ ওমৰ আলহান্দি । লগতে ২৫২ ডিভিজনৰ আইডিএফ সংৰক্ষকসকলে নিশাটোৰ ভিতৰতে ১৯ জন হামাছ সন্ত্ৰাসবাদীক আক্ৰমণ কৰে । এই সন্ত্ৰাসবাদীসকলে ইজৰাইলী বাহিনীক আক্ৰমণ কৰাৰ প্ৰস্তুতি চলাই আছিল ।
৪০১ আৰ্মৰ্ড ব্ৰিগেড কমবেট ৰিকনছাইন্স ইউনিটৰ যুঁজাৰুসকলে সাগৰৰ পাৰত অৱস্থিত এটা কণ্টেইনাৰ ধ্বংস কৰে, য'ত প্ৰায় ২০ টা ৰকেট লঞ্চাৰ আছিল । আনহাতে, টাইমছ অব ইজৰাইলৰ বাতৰি অনুসৰি, ইজৰাইলে স্থাপন কৰা মানৱীয় কৰিডৰৰ জৰিয়তে প্ৰায় ৫০,০০০ পেলেষ্টাইনী উত্তৰৰ পৰা দক্ষিণ গাজালৈ স্থানান্তৰিত হৈছে । ৰাষ্ট্ৰসংঘৰ কাৰ্যালয়ৰ মানৱীয় পৰিক্ৰমা সমন্বয়কাৰীয়ো এই কথা ঘোষণা কৰিছে ।
উল্লেখ্য যে বাইডেন প্ৰশাসনৰ হেঁচাৰ পিছত প্ৰথমবাৰৰ বাবে উত্তৰ গাজাৰ কেইবাটাও চুবুৰীয়া অঞ্চলত ইজৰাইলী প্ৰতিৰক্ষা বাহিনীয়ে (আইডিএফ) চলাই থকা যুদ্ধত আনুষ্ঠানিক মানৱীয় বিৰতিৰ বাবে ৰেলেষ্টাইনীসকলে উত্তৰ গাজা খালী কৰিবলৈ সক্ষম হৈছে । দ্য টাইমছ অব ইজৰাইলৰ বাতৰি অনুসৰি, একেৰাহে ষষ্ঠ দিনৰ বাবে আইডিএফে এই লোকসকলক উত্তৰ গাজাৰ পৰা পলায়ন কৰিবলৈ আৰু ছালাহৰ মাজেৰে দক্ষিণলৈ যাবলৈ অনুমতি দিছে আৰু সাত ঘণ্টাৰ ভিতৰত ৫০,০০০ লোকক স্থানান্তৰিত কৰা হৈছে ।
