ইন্টাৰনেশ্যনেল ডেস্ক, 9 ছেপ্টেম্বৰ : ব্ৰিটিছ ইতিহাসৰ আটাইতকৈ দীঘলীয়া সময়ৰ বাবে ৰাজত্ব কৰাৰ গৌৰৱ অৰ্জন কৰিছে ৰাণী এলিজাবেথ দ্বিতীয়ই(Britains Longest Serving Monarch) ৷ তেওঁ প্ৰায় 70 বছৰ বৃটেইনৰ শাসনৰ বাঘজৰী চম্ভালিছিল ৷ 2015 চনত তেওঁৰ আজু আইতা তথা ৰাণী ভিক্টোৰিয়াৰ অভিলেখ ভংগ কৰি বৃটিছ ইতিহাসত দীৰ্ঘতম সময়ৰ বাবে ৰাজত্ব কৰাৰ গৌৰৱ অৰ্জন কৰে ৷ ৰাণী ভিক্টোৰিয়াই বৃটেইনত ৬৩ বছৰ আৰু সাত মাহ শাসন কৰিছিল ।
2016 চনত থাইলেণ্ডৰ ৰজা ভূমিবল আদুলিয়াদেজৰ মৃত্যুৰ পিছত এলিজাবেথ বিশ্বৰ আটাইতকৈ দীঘলীয়া ৰাজত্ব কৰা ৰাণী হিচাপে পৰিগণিত হয় । 2022 চনত তেওঁ সপ্তদশ শতিকাৰ ফৰাচী ৰজা চতুৰ্দশ ফৰাচী ৰজা লুইচ চতুৰ্দশৰ পিছত বিশ্ব ইতিহাসৰ দ্বিতীয় দীৰ্ঘতম সময় ৰাজত্ব কৰা সম্ৰাজ্ঞী হিচাপে পৰিগণিত হয়(Death of Queen Elizabeth II) ।
এলিজাবেথ আৰু ভিক্টোৰিয়াৰ বাহিৰে, ব্ৰিটিছ ইতিহাসত মাত্ৰ চাৰিজন ৰাজতন্ত্ৰই 50 বছৰতকৈ অধিক সময় শাসন কৰাৰ কৃতিত্ব অৰ্জন কৰিছে ৷ তেওঁলোক ক্ৰমে: জৰ্জ তৃতীয় (59 বছৰ), হেনৰী তৃতীয় (56 বছৰ), এডৱাৰ্ড তৃতীয় (50 বছৰ) আৰু স্কটলেণ্ডৰ জেমছ ষষ্ঠ (58 বছৰ) ।
ঘৰতে শিক্ষা গ্ৰহণ: এলিজাবেথে কেতিয়াও ৰাজহুৱা বিদ্যালয়লৈ যোৱা নাছিল তথা কেতিয়াও আন কোনো শিক্ষাৰ্থীৰ সংস্পৰ্শলৈ অহা নাছিল । তেওঁ ভগ্নী মাৰ্গাৰেটৰ সৈতে ঘৰতে শিক্ষা গ্ৰহণ কৰিছিল । তেওঁক শিক্ষাগুৰু হিচাপে আছিল তেওঁৰ পিতৃ, ইটন কলেজৰ এজন জ্যেষ্ঠ শিক্ষক আৰু কেইবাজনো ফৰাচী গুৰু । কেণ্টাৰবাৰীৰ আৰ্কবিছ'পে তেওঁক ধৰ্মৰ পাঠ শিকাইছিল । এলিজাবেথৰ স্কুলীয়া শিক্ষাত ঘোঁৰা চালনা, সাঁতোৰ, নৃত্য আৰু সংগীতৰ অধ্যয়ন অন্তৰ্ভুক্ত আছিল ।
নম্বৰ 230873: দ্বিতীয় বিশ্বযুদ্ধৰ সময়ত ৰাজকুমাৰী এলিজাবেথ চমুকৈ নম্বৰ 230873 অক্সিলিয়াৰী ট্ৰান্সপোৰ্ট চাৰ্ভিচ নং 1-ৰ দ্বিতীয় চুবাল্টাৰ্ণ এলিজাবেথ আলেকজেন্দ্ৰা মেৰী উইণ্ডচাৰ হিচাপে পৰিচিত হৈছিল । দ্বিতীয় বিশ্বযুদ্ধত সাহাৰ্য প্ৰদানৰ বাবে পিতৃ-মাতৃৰ পৰা অনুমতি লাভ কৰাৰ পাছত তেওঁ এম্বুলেন্স আৰু ট্ৰাক চলাবলৈ শিকিছিল । কেইমাহমানৰ ভিতৰতে তেওঁ সন্মানীয় জুনিয়ৰ কমাণ্ডাৰ পদলৈ উন্নীত হৈছিল ।
আনক অনুকৰণ কৰাত পাৰদৰ্শী: এলিজাবেথে আনৰ আগত নিজৰ এখন গহীন প্ৰতিচ্ছবি উপস্থাপন কৰিছিল যদিও তেওঁ পৰিচিতসকলৰ মাজত চঞ্চল, দুষ্ট তথা ফূৰ্তিবাজ হিচাপে জনাজাত আছিল ৷ তেওঁ আনৰ অনুকৰণ কৰাত অতি পাকৈত আছিল ৷ তেওঁৰ ঘৰুৱা পুৰোহিত বিছ'প মাইকেল মানে এবাৰ কৈছিল- "অনুকৰণ কৰাৰ কলা ৰাণী এলিজাবেথৰ আটাইতকৈ আমোদজনক কামবোৰৰ ভিতৰত অন্যতম আছিল" ।
ৰাজকীয় কৰদাতা: তেওঁ ৰাণী হোৱাৰ সত্বেও 1992 চনৰ পৰা কৰ পৰিশোধ কৰিছিল । ১৯৯২ চনত তেওঁৰ সপ্তাহান্তৰ বাসগৃহ বিণ্ডছৰ দুৰ্গত জুই লগাৰ পাছত ইয়াৰ মেৰামতিৰ বাবে লাখ লাখ পাউণ্ড খৰচ কৰাৰ বিৰুদ্ধে জনতাই বিদ্ৰোহ কৰিছিল । কিন্তু তেওঁ স্বেচ্ছাই তেওঁৰ ব্যক্তিগত উপাৰ্জনৰ ওপৰত কৰ পৰিশোধ কৰিবলৈ সন্মত হৈছিল ।
লিটল লিলিবেট: ৰাণী এলিজাবেথক তেওঁৰ মাতৃ, আইতা আৰু আইতাক সন্মানত য়ৰ্কৰ এলিজাবেথ আলেকজেন্দ্ৰা মেৰী উইণ্ডচাৰ নাম দিয়া হৈছিল । কিন্তু সৰুতে তেওঁক পৰিয়ালৰ সকলোৱে মৰমতে লিটল লিলিবেট বুলি মাতিছিল ৷ ইয়াৰ কাৰণ হৈছে তেওঁ 'এলিজাবেথ' সঠিকভাৱে উচ্চাৰণ কৰিব পৰা নাছিল ।
বৈবাহিক জীৱন: এলিজাবেথ আৰু তেওঁৰ স্বামী প্ৰিন্স ফিলিপে 70 বছৰৰো অধিক সময় ধৰি একেলগে আছিল ৷ তেওঁলোকৰ চাৰিটা সন্তান আছিল । 1939 চনত গ্ৰীচৰ এজন 18 বছৰীয়া নৌ-কেডেট প্ৰিন্স ফিলিপক 13 বছৰীয়া এলিজাবেথৰ মনোৰঞ্জনৰ বাবে পঠোৱা হৈছিল ৷ কেইবাবছৰৰ পিছত, ফিলিপক খ্ৰীষ্টমাছত উইণ্ডছৰ কেচেলৰ ৰাজপৰিয়ালত যোগদান কৰিবলৈ আমন্ত্ৰণ জনোৱা হৈছিল ৷ তাত তেওঁ তেওঁৰ প্ৰেম প্ৰকাশ কৰিছিল । পুত্ৰ এণ্ড্ৰিউৰ মতে, 2021 চনত 99 বছৰ বয়সত ফিলিপৰ মৃত্যুৰ পাছত এলিজাবেথৰ জীৱনত এক 'বৃহৎ শূন্যতা' বিৰাজ কৰিছিল ।
জন্মদিন: এলিজাবেথৰ জন্ম 1926 চনৰ 21 এপ্ৰিলত হৈছিল ৷ কিন্তু তেওঁৰ জন্মদিন উদযাপনক লৈ জনতাৰ মাজত সদায় বিভ্ৰান্তিৰ সৃষ্টি হৈছিল । তেওঁৰ আনুষ্ঠানিক জন্মদিন উদযাপনৰ বাবে কোনো সাৰ্বজনীন নিৰ্ধাৰিত দিন নাছিল ৷ জুনৰ প্ৰথম, দ্বিতীয় বা তৃতীয় শনিবাৰে চৰকাৰৰ সিদ্ধান্ত অনুসৰি তেওঁৰ জন্মদিন উদযাপন কৰা হৈছিল ৷ অষ্ট্ৰেলিয়াত জুনৰ দ্বিতীয় সোমবাৰে আৰু কানাডাত 24 মে'ত বা ৰাণী ভিক্টোৰিয়াৰ জন্মদিনৰ আগৰ সোমবাৰে ৰাণী এলিজাবেথ দ্বিতীয়ৰ জন্মদিন উদযাপন কৰা হৈছিল । কেৱল ৰাণী তথা তেওঁৰ নিকাটাত্মীয়ই এক ব্যক্তিগত অনুষ্ঠানত তেওঁৰ প্ৰকৃত জন্মদিন উদযাপন কৰিছিল ।
কুকুৰ প্ৰেম: কুকুৰ এলিজাবেথৰ বহুত প্ৰিয় আছিল ৷ ৰাজকুমাৰী ডায়েনাই ৰাণীৰ সৈতে থকা কুকুৰবোৰক 'চলমান কাৰ্পেট' বুলি অভিহিত কৰিছিল, কিয়নো সিহত সকলো ঠাইতে তেওঁৰ লগত আছিল ।
এগৰাকী অত্যন্ত মৰমিয়াল যুৱতী: সম্ৰাজ্ঞী মূলতঃ পপ গানৰ বিষয় হৈ পৰিছিল । বিটলছে 'Her Mijestry' গানটোৰে তেওঁক অমৰ কৰিছিল আৰু এগৰাকী অত্যন্ত মৰমলগা ছোৱালী বুলি অভিহিত কৰিছিল । পল মেককাৰ্টনিয়ে কন্ঠদান কৰা আৰু 1969 চনত ৰেকৰ্ড কৰা এই গানটো 'এবে ৰোড' এলবামৰ শেষত প্ৰকাশ কৰা হৈছিল ।
লগতে পঢ়ক: বৃটেইনৰ ৰাণী এলিজাবেথ দ্বিতীয়ৰ ইহলীলা সম্বৰণ
