ইণ্টাৰনেচনেল ডেস্ক, ২১ অক্টোবৰ : হামাছে বন্দী কৰি ৰখা এগৰাকী আমেৰিকান মহিলা আৰু তেওঁৰ কিশোৰী কন্যাক মুকলি কৰি দিছে । এই খবৰত আমেৰিকা যুক্তৰাষ্ট্ৰৰ ৰাষ্ট্ৰপতি জো বাইডেনে আদৰণি জনাইছে । শুকুৰবাৰে ইজৰাইলৰ পৰা অহা এই আশ্চৰ্যকৰ বাতৰিটোক বিশ্বৰ আন আন নেতাসকলৰ লগতে বাইডেনে আদৰণি জনায় ।
উল্লেখ্য যে হামাছে আমেৰিকান মহিলাগৰাকী আৰু তেওঁৰ কিশোৰী কন্যাক দুসপ্তাহ ধৰি গাজাত বন্দী কৰি ৰাখিছিল । ইজৰাইলী সেনাৰ এজন মুখপাত্ৰই জনাইছে যে জুডিথ ৰাণান আৰু তেওঁৰ ১৭ বছৰীয়া কন্যা নাটালী নামৰ দুগৰাকী আমেৰিকান গাজা ষ্ট্ৰিপৰ বাহিৰত ইজৰাইলী সামৰিক বাহিনীৰ সৈতে আছে । আনহাতে, হামাছে শুকুৰবাৰে প্ৰকাশ কৰে যে কাটাৰ চৰকাৰৰ সৈতে হোৱা চুক্তি মতে মানৱীয় কাৰণত তেওঁলোকক মুকলি কৰি দিছে ।
ইজৰাইলৰ মতে হামাছে ৭ অক্টোবৰত তেওঁলোকৰ তাণ্ডৱৰ সময়ত প্ৰায় ২০০ জন লোকক অপহৰণ কৰি বন্দী কৰাৰ পিছত তেওঁলোক হৈছে মুকলি কৰি দিয়া প্ৰথম বন্দী । "মই আনন্দিত যে তেওঁলোক সোনকালেই তেওঁলোকৰ পৰিয়ালৰ সৈতে পুনৰ মিলিত হ'ব, যিসকল ভয়ত কাতৰ হৈ আছে ।" বাইডেনে ৱাশ্বিংটনত কয় । আনহাতে, মুকলি কৰি দিয়া আমেৰিকান দুগৰাকীক গাজাৰ পৰা ইজৰাইললৈ লৈ যোৱা ৰেড ক্ৰছৰ আন্তৰ্জাতিক সমিতিয়ে কয় যে তেওঁলোকৰ মুক্তিয়ে 'এতিয়াও বন্দী হৈ থকাসকলৰ বাবে এক আশাৰ ৰেঙনি' দেখুৱাইছে ।
পৰিয়ালৰ সদস্যসকলে জনোৱা অনুসৰি, জুডিথ আৰু নাটালি ৰাণানে চিকাগোৰ উপনগৰ ইভানষ্টনৰ ঘৰৰ পৰা ইজৰাইললৈ ইহুদীসকলৰ বন্ধ উদযাপন কৰিবলৈ গৈছিল । তেওঁলোক ৭ অক্টোবৰত গাজাৰ ওচৰৰ নাহাল ওজত আছিল । তাত ইহুদী বন্ধৰ চিমচাট তোৰাহ নামৰ এক উৎসৱৰ আয়োজন কৰা হৈছিল । সেই সময়তে হামাছ আৰু অন্যান্য সন্ত্ৰাসবাদীয়ে দক্ষিণ ইজৰাইলৰ চহৰসমূহত প্ৰৱেশ কৰি শ শ লোকক হত্যা কৰিছিল আৰু বহু লোকক অপহৰণ কৰিছিল ।
আক্ৰমণৰ পিছৰে পৰা পৰিয়ালটোৱে তেওঁলোকৰ বিষয়ে একো জানিব পৰা নাছিল । অৱশ্যে পিছত আমেৰিকা যুক্তৰাষ্ট্ৰ আৰু ইজৰাইলী বিষয়াসকলে তেওঁলোকক গাজাত বন্দী কৰি ৰখা বুলি কৈছিল । নাটালীৰ ভাতৃ বেনে পূৰ্বতে এনেদৰে কৈছিল । উল্লেখ্য যে জুডিথ আৰু নাটালীক হামাছে মুকলি কৰি দিয়া বাতৰিটো অভূতপূৰ্ব ।
