নিউজ ডেস্ক, 3 নৱেম্বৰ: তুৰ্কীৰ প্ৰতিৰক্ষা মন্ত্ৰালয়ৰ সূত্ৰই প্ৰকাশ কৰা অনুসৰি, ছিৰিয়াৰ উত্তৰ দিশত অৱস্থিত ছিৰিয়া আৰু তুৰ্কীৰ সীমান্তৱৰ্তী এখন চহৰত সংঘটিত বোমা বিস্ফোৰণত নিহত হৈছে 13 জনকৈ লোক ৷ মন্ত্ৰালয়ৰ সূত্ৰটোৱে প্ৰকাশ কৰা অনুসৰি কেন্দ্ৰীয় তাল আব্যাদ চহৰত ঘটা এই বিস্ফোৰণত অন্য 20 জন লোকো অহত হৈছে ৷ উল্লেখ্য যে, এই তাল আব্যাদ চহৰখন বিগত মাহত তুৰ্কী সমৰ্থিত বন্দুকধাৰীয়ে কুৰ্দিছ যুঁজাৰুৰ পৰা নিজৰ দখললৈ আনিছিল ৷
তুৰ্কীৰ প্ৰতিৰক্ষা মন্ত্ৰালয়ে এই বোমা বিস্ফোৰণৰ আঁৰত কুৰ্দিছ যুঁজাৰু জড়িত বুলি সন্দেহ প্ৰকাশ কৰিছে আৰু বিস্ফোৰণক কঠোৰ ভাষাৰে নিন্দা কৰিছে ৷ লগতে এনে "বৰ্বৰ সন্ত্ৰাসবাদী সংগঠন"ৰ বিৰুদ্ধে ব্যৱস্থা ল'বলৈ আন্তৰ্জাতিক সম্প্ৰদায়ক আহ্বান জনাইছে ৷ অৱশ্যে তাৎক্ষণিকভাৱে এই ঘটনাৰ দায়িত্ব এতিয়ালৈকে কোনেও স্বীকাৰ কৰা নাই ৷ তুৰ্কীয়ে যোৱা মাহত উত্তৰ-পূৱ ছিৰিয়াত কুৰ্দিছ যুঁজাৰুসকলক আঁতৰাবলৈ সামৰিক অভিযান চলাইছিল ৷
এই কুৰ্দিছ যুঁজাৰুসকলক তুৰ্কীত চলা কুৰ্দিছ বিচ্ছিন্নতাবাদৰ সৈতে সম্পৰ্কিত বুলি তুৰ্কীয়ে দাবী কৰি আহিছে ৷ শনিবাৰে, কুৰ্দিছসকলে নেতৃত্ব দিয়া চিৰিয়ান ডেম'ক্ৰেটিক ফৰ্চে জনাইছিল যে - কুৰ্দিছ যুঁজাৰু আৰু তুৰ্কী সমৰ্থিত বাহিনীৰ মাজত বিবাদ চলি থকা ছিৰিয়াৰ উত্তৰাঞ্চলত খ্ৰীষ্টিয়ান যুঁজাৰুসকলে নিৰাপত্তাৰ তদাৰকী কৰিব ৷ চিৰিয়ান ডেম'ক্ৰেটিক ফৰ্চে তাল তামুৰ চহৰৰ আশে-পাশে থকা গাঁৱবোৰত সেনা মোতায়েন কৰাৰ কথা জনাইছিল ৷ এই অঞ্চলটো ঘাইকৈ খ্ৰীষ্টিয়ান ছিৰিয়াক আৰু এছেৰিয়ান সম্প্ৰদায়ৰ বসতিস্থল ৷
উল্লেখ্য যে, 2011 চনৰ পৰাই ছিৰিয়া অসামৰিক যুদ্ধত জৰ্জৰিত হৈ আছে ৷ এতিয়ালৈকে 3 লাখ 70 হাজাৰতকৈও অধিক লোক এই যুদ্ধত নিহত হৈছে ,লক্ষ লক্ষ লোক যুদ্ধৰ বাবে স্থানান্তৰিত হ'বলগীয়া হৈছে ৷
